پاکستان تحریک انصاف (پی ٹی آئی) کے بانی عمران خان کی ہمشیرہ علیمہ خان نے کہا ہے کہ بانی پاکستان تحریک انصاف نے آرمی چیف جنرل عاصم منیر کو فیلڈ مارشل کا عہدہ ملنے پر کہا ہے کہ یہ کافی نہیں ہے انہیں بادشاہ کا خطاب دینا چاہیے تھا۔
میڈیا سے گفتگو کرتے ہوئے ان کا کہنا تھا کہ عمران خان نے کہا ہے کہ جس ملک میں جنگل کا قانون ہو اس ملک میں فیلڈ مارشل نہیں بادشاہ کا خطاب دینا چاہیے۔
عمران خان نے کہا ہے کہ فیلڈ مارشل کی جگہ خود کو بادشاہ بنا لیتے , کیونکہ جنگل کے قانون میں بادشاہ ہوتا ہے۔ علیمہ خان
pic.twitter.com/mXZteEyFyF— PTI (@PTIofficial) May 21, 2025
یہ بھی پڑھیں جنرل عاصم منیر کے نئے عہدے نے ان کی ذمے داریاں بڑھادیں، تحریک انصاف پر سختیاں ختم ہونی چاہییں، بیرسٹر گوہر
اب تحریک انصاف پر سختیاں ختم ہونی چاہییں، بیرسٹر گوہر
دوسری جانب چیئرمین پی ٹی آئی بیرسٹر گوہر نے جنرل سید عاصم منیر کو فیلڈ مارشل کا عہدہ ملنے کے حوالے سے کہا ہے کہ اب ان پر زیادہ ذمے داریاں عائد ہوتی ہیں اور انہیں مزید کردار ادا کرنا ہوگا کیوں کہ اب بہت عرصہ ہوگیا ہم چاہتے ہیں کہ پی ٹی آئی پر سختیاں ختم ہوں۔
صحافیوں سے گفتگو کے دوران جب ان سے پوچھا گیا کہ کیا وہ جنرل سید عاصم منیر کو فیلڈ مارشل کے عہدے پر ترقی پانے پر مبارکباد دیں گے تو انہوں نے کہا کہ “مبارکباد دی ہے، پاکستان تحریک انصاف اپنا باقائدہ موقف جاری بھی کردے گی”۔ تاہم انہوں نے کہا کہ ہمارا فوج کے ساتھ کوئی جھگڑا نہیں ہے اور عمران خان بھی یہ کہہ چکے ہیں کہ پی ٹی آئی پاکستان کی افواج کے ساتھ ہے اور افواج سے جو بھی تعلق رکھے گا وہ ہمارے لیے غیر متنازع ہوگا۔
بیرسٹر گوہر نے کہا کہ تحریک انصاف کے فوج کے ساتھ رابطے بحال نہیں ہوئے ہیں لیکن ہماری خواہش ضرور ہے کہ (بحال ہوجائیں) کیوں کہ عمران خان نے بھی کہا ہے ہم نے فوج کے ساتھ مذاکرات کے دروازے کبھی بند نہیں کیے ہیں۔
انہوں نے کہا کہ بھارت کے خلاف پاکستان کی کامیابی نے پوری قوم کو سرخرو کیا ہے اور وہ فضا ہمیں قائم رکھنی چاہیے کیوں کہ بھارت پھر کوئی حرکت بھی کر سکتا ہے اس لیے پوری قوم میں اتحاد ضروری ہے۔
بیرسٹر گوہر نے کہا ہم اور ساری دنیا یہ کہہ رہی ہے کہ فوج کا سیاست میں کوئی رول نہیں ہونا چاہیے اور جو بھی ہو وہ جو کچھ کرے سیاست سے بالاتر ہوکر کرے۔
تاہم انہوں نے یہ بھی کہا کہ بہرحال فوج ایک بڑا ادارہ ہے اور اس کا سیاست پر اثر تھا اور ہے بھی اس لیے لہٰذا میں تو یہی درخواست کروں گا کہ حالات کو بہتری کی طرف لے جانے کے لیے جو کوئی بھی کچھ کرسکتا ہو وہ اپنا کردار ادا کرے۔
یہ بھی پڑھیں پی ٹی آئی سینیٹر ہمایوں مہمند کی فیلڈ مارشل جنرل عاصم منیر کو مشروط مبارکباد
بیرسٹر گوہر نے کہا کہ عمران خان 2 سال سے جیل میں ہیں اور اتنا عرصہ انہیں قید میں رکھنا نا انصافی ہے۔ انہوں نے چیف جسٹس سے اپیل کی کہ عمران خان کا کیس لگا دیں۔
