وفاقی کابینہ نے وزارت توانائی کےایجنڈے کی منظوری دیتے ہوئے پیٹرولیم لیوی کااختیارپیٹرولیم ڈویژن کو تفویض کرنے سمیت ترامیم کے ساتھ فائنانس بل کی بھی منظوری دے دی۔
وزیر اعظم شہباز شریف کی زیر صدارت وفاقی کابینہ کے اجلاس میں اراکین کو قومی سلامتی کمیٹی کے فیصلوں پراعتماد میں لیا گیا، وفاقی وزرا سمیت دیگر اراکین نے ایران اسرائیل کشیدگی میں کمی پراطمینان کا اظہارکیا۔
یہ بھی پڑھیں: پیٹرولیم لیوی بڑھنےکا امکان، کیا پیٹرول کی قیمت میں بڑا اضافہ ناگزیر ہوگا؟
وفاقی کابینہ نے وزیراعظم شہباز شریف اور فیلڈ مارشل عاصم منیر کے ملکی دفاع میں زبردست کردار کو سراہتے ہوئے قرارداد بھی منظور کی، کابینہ اراکین نے وزارت توانائی کے ایجنڈے کی بھی منظوری دیتے ہوئے پیٹرولیم لیوی کااختیار پیٹرولیم ڈویژن کودینےکی منظوری بھی دیدی۔
ذرائع کے مطابق پیٹرولیم لیوی کا اختیار پیٹرولیم ڈویژن کو دینے کے فیصلے سے تیل و گیس کے شعبے میں پالیسی سازی مزید مؤثر ہونے کی توقع ہے، اس اقدام سے محصولات میں بہتری اور فیصلوں میں تاخیر ختم ہونے کی امید ہے۔
مزید پڑھیں: کاربن لیوی میں اضافہ، حاصل ہونے والی رقم کن مقاصد میں استعمال ہوگی؟
کابینہ اجلاس میں ملکی مجموعی صورتحال کا بھی جائزہ لیا گیا اور معاشی کارکردگی سمیت دفاع کے شعبے میں پیش رفت پر اطمینان کا اظہار کیا گیا، کابینہ اراکین کو قومی سلامتی کمیٹی کے فیصلوں پر بھی اعتماد میں لیا گیا۔
کابینہ اجلاس میں دیگر قومی و بین الاقوامی امور سمیت مہنگائی کی صورتحال، بجٹ تجاویز، اور توانائی بحران پر بھی تبادلہ خیال کیا گیا، کابینہ کو بتایا گیا کہ رواں مالی سال کی پہلی ششماہی میں برآمدات میں بہتری آئی ہے جبکہ زرمبادلہ کے ذخائر میں بھی استحکام دیکھنے میں آیا ہے۔
