بھارتی ریاست اڑیسہ کے شہر پوری میں واقع شری گنڈچا مندر کے قریب اتوار کی صبح جگن ناتھ رتھ یاترا کے دوران شدید بھگدڑ کے نتیجے میں کم از کم 3 افراد جان کی بازی ہار گئے جبکہ 50 دیگر زخمی ہو گئے۔
ضلع پوری کے کلکٹر سدھارتھ ایس سوائن کے مطابق، واقعہ صبح تقریباً 4 سے 4:30 بجے کے درمیان اس وقت پیش آیا جب سینکڑوں عقیدت مند شری گنڈچا مندر میں درشن کے لیے جمع تھے, اچانک ہجوم کا دباؤ بڑھ گیا جس کے باعث بھگدڑ جیسی صورتحال پیدا ہو گئی۔
مزید پڑھیں: احمد آباد میں رتھ یاترا کے دوران ہاتھی بے قابو، لوگوں میں خوف و ہراس
ریسکیو ٹیموں نے فوری کارروائی کرتے ہوئے زخمیوں کو پوری کے ضلعی اسپتال منتقل کیا، جہاں 6 افراد کی حالت تشویشناک بتائی گئی ہے۔
یہ افسوسناک واقعہ مندر کے سامنے واقع ساردھابلی کے مقام پر پیش آیا، جہاں ہندوؤں کے بھگوان جگن ناتھ رتھ پر سوار تھے، درشن کے دوران ہجوم بے قابو ہو گیا، اور افراتفری کے عالم میں کئی افراد زمین پر گر گئے اور کچلے گئے۔
تحقیقات اور اعلیٰ افسران کے تبادلے
واقعے کی سنگینی کو مدنظر رکھتے ہوئے ریاستی حکومت نے فوری کارروائی کرتے ہوئے پوری کے سپرنٹنڈنٹ آف پولیس ونیت اگروال اور ضلعی مجسٹریٹ سدھارتھ شنکر سوائن کو ان کے عہدوں سے ہٹا دیا ہے۔ پناک مشرا، جو اس وقت ایڈیشنل ڈائریکٹر جنرل (کرائم) ہیں، کو نئی ذمہ داری کے طور پر پوری کا ایس پی مقرر کیا گیا ہے، جبکہ چنچل رانا، کلکٹر کھوردہ، کو پوری کا نیا ڈی ایم تعینات کیا گیا ہے۔
اس کے علاوہ دو پولیس افسران ڈی سی پی بشنو پتی اور کمانڈنٹ اجے پادھی کو معطل کر دیا گیا ہے۔
سیاسی ردعمل اور وزیر اعلیٰ کا بیان
پوری بھگدڑ کے واقعے پر اڑیسہ کے وزیر اعلیٰ، راہول گاندھی اور نوین پٹنایک سمیت دیگر سیاسی رہنماؤں نے گہرے دکھ اور افسوس کا اظہار کیا ہے۔
اڑیسہ کے وزیر اعلیٰ نے واقعے پر شدید رنج و غم کا اظہار کرتے ہوئے کہا کہ شاردھابلی میں مہاپربھو کے درشن کی شدید خواہش کے باعث ہجوم میں دھکم پیل اور بدنظمی پیدا ہوئی، جس سے یہ افسوسناک واقعہ پیش آیا۔ ’ذاتی طور پر میں اور میری حکومت تمام جگن ناتھ بھکتوں سے معذرت خواہ ہیں۔‘
وزیر اعلیٰ نے اس واقعے کو ناقابلِ معافی غفلت قرار دیتے ہوئے سیکیورٹی میں غفلت کی فوری تحقیقات اور ذمہ داروں کے خلاف سخت اور عبرتناک کارروائی کا اعلان کیا۔
