بھارتی پنجاب کے شہر فیروز پور سے سوشل میڈیا پر ایک افسوسناک اور دل دہلا دینے والی ویڈیو سامنے آئی ہے، جس میں ایک نوجوان کرکٹر کو چھکا مارنے کے فوراً بعد گر کر جان دیتے ہوئے دیکھا جا سکتا ہے۔
یہ بھی پڑھیں: چوکا لگانے کے بعد کھلاڑی میدان ہی میں چل بسا
بھارتی میڈیا کے مطابق، یہ افسوسناک واقعہ ڈی اے وی اسکول گراؤنڈ میں پیش آیا، جہاں ہرجیت سنگھ نامی بلے باز نے ایک گیند پر شاندار چھکا مارا۔ مگر چھکا لگانے کے فوراً بعد وہ پچ پر گھٹنوں کے بل بیٹھ گیا اور اچانک زمین پر گر پڑا۔
छक्का मारते ही बल्लेबाज को आया हार्ट अटैक, पिच पर ही गिर गया और मौत हो गई ।ये घटना पंजाब के फिरोजपुर की है । pic.twitter.com/06QvVAEdp0
— Dr Anurag bhadouria (@anuragspparty) June 29, 2025
ویڈیو میں واضح طور پر دیکھا جا سکتا ہے کہ جیسے ہی وہ گرتا ہے، دیگر کھلاڑی اس کی مدد کے لیے دوڑتے ہیں اور فوری طور پر مصنوعی تنفس فراہم کرنے کی کوشش کرتے ہیں، لیکن بدقسمتی سے وہ جانبر نہ ہو سکا۔
ابتدائی اطلاعات کے مطابق ہرجیت سنگھ کو کرکٹ کھیلتے ہوئے دل کا دورہ پڑا جو جان لیوا ثابت ہوا۔
مزید پڑھیں:کرکٹ میچ کے دوران بھاگتے ہوئے بھارتی کھلاڑی جاں بحق: ویڈیو وائرل
یہ پہلا واقعہ نہیں ہے، جون 2024 میں ممبئی کے کشمیرا علاقے میں بھی ایک ایسا ہی سانحہ پیش آیا تھا، جہاں رام گنیش تیواری نامی 42 سالہ شخص کرکٹ میچ کے دوران چھکا لگانے کے بعد اچانک زمین پر گر پڑا، اسپتال منتقل کیے جانے پر اسے مردہ قرار دے دیا گیا تھا۔
حالیہ مہینوں میں بھارت میں کھیل کے دوران دل کا دورہ پڑنے سے ہونے والی اموات میں اضافہ دیکھنے میں آیا ہے، جس نے کھیل کے میدانوں میں موجود حفاظتی انتظامات اور طبی سہولیات پر سوالیہ نشان کھڑے کر دیے ہیں۔
