وزیراعظم محمد شہباز شریف سے پاکستان میں تعینات سعودی عرب کے سفیر نواف بن سعید المالکی نے وزیراعظم آفس میں ملاقات کی، جس میں دو طرفہ تعلقات، مشرق وسطیٰ میں امن، اور علاقائی استحکام پر تبادلہ خیال کیا گیا۔
وزیراعظم نے حرمین شریفین کے خادم، شاہ سلمان بن عبدالعزیز اور ولی عہد شہزادہ محمد بن سلمان کے لیے نیک تمناؤں کا اظہار کرتے ہوئے ان کی قیادت میں سعودی عرب کی خطے میں قیامِ امن کی کوششوں کو سراہا۔
وزیراعظم نے 24 جون کو شہزادہ محمد بن سلمان سے ہونے والی اپنی گفتگو کا حوالہ دیتے ہوئے، پاکستان اور بھارت کے درمیان جنگ بندی میں سعودی کردار کو بھی سراہا۔
مزید پڑھیں: شہباز شریف کے ساتھ اختلافات؟ نواز شریف نے خاموشی توڑ دی
شہباز شریف نے بتایا کہ پاکستان نے جولائی کے مہینے کے لیے اقوام متحدہ کی سلامتی کونسل کی صدارت سنبھالی ہے، اور اس دوران سعودی عرب کی حمایت کے ساتھ اپنا مؤثر کردار ادا کرنے کے عزم کا اظہار کیا۔
سعودی سفیر نواف المالکی نے خطے میں امن و استحکام کے لیے پاکستان کے مثبت کردار کو سراہتے ہوئے وزیراعظم کا شکریہ ادا کیا۔
