پاکستان تحریک انصاف نے جلسوں کا شیڈول جاری کر دیا ہے جس کے مطابق چیئرمین پی ٹی آئی عمران خان 10 مئی بروز بدھ سے اپنے جلسوں کا آغاز کریں گے۔
تحریک انصاف (پی ٹی آئی) کے میڈیا ڈیپارٹمنٹ کے مطابق عمران خان بدھ کو مریدکے میں جلسے سے خطاب کریں گے جبکہ جمعرات کو گکھڑ اور جمعتہ المبارک کو لالہ موسیٰ جائیں گے۔
سابق وزیراعظم ہفتے کے روز گوجر خان میں عوام سے خطاب کریں گے جبکہ 14 مئی بروز اتوار کو اٹک میں جلسہ کریں گے۔
پاکستان تحریک انصاف کے جلسوں کا شیڈیول جاری
بدھ کو چیئرمین تحریک انصاف عمران خان مریدکے میں جلسۂ عام سے خطاب کریں گے
جمعرات کو گکھڑ جمعتہ المبارک کو لالہ موسیٰ میں جلسہ ہائے عام منعقد کئے جائیں گے
ہفتے کو عمران خان گوجر خان جائیں گے اور جلسۂ عام سے مخاطب ہوں گے
اتوار کو…
— PTI (@PTIofficial) May 7, 2023
واضح رہے کہ ملک میں ایک ہی روز انتخابات کرانے کے لیے حکمران اتحاد کے ساتھ مذاکرات کی ناکامی کے بعد عمران خان نے مطالبہ کیا تھا کہ پنجاب میں 14 مئی کو الیکشن کرائے جائیں۔
عمران خان نے اتوار کے روز ویڈیو لنک کے ذریعے اپنے خطاب میں کہا کہ اب جو تحریک شروع ہو گی وہ پکڑ دھکڑ سے نہیں رُکے گی۔ ہم چیف جسٹس اور سپریم کورٹ کے ساتھ کھڑے ہیں۔
یہ بھی یاد رہے کہ اتوار کے روز ہی چیف جسٹس پاکستان جسٹس عمر عطا بندیال نے ایک تقریب سے خطاب کے دوران کہا ہے کہ اگر 90 روز میں انتخابات کرانا آئینی ضرورت ہے تو ہم اس پر عملدرآمد کرائیں گے۔
اس کے علاوہ تحریک انصاف کی سینیئر رہنما یاسمین راشد نے امید ظاہر کی ہے کہ پیر کے روز انتخابات کے حوالے سے تاریخ کا اعلان ہو جائے گا۔
دوسری جانب حکومت اس بات پر بضد ہے کہ قومی اسمبلی کی مدت مکمل ہونے کے بعد پورے ملک میں ایک ساتھ انتخابات کرائے جائیں گے۔
وزیر دفاع خواجہ آصف یہاں تک کہہ چکے ہیں کہ اب کی بار پارلیمنٹ ہتھیار نہیں ڈالے گی۔
