پاکستان تحریک انصاف کے بانی عمران خان نے کہا ہے کہ لاہور اجلاس کے حوالے سے پارٹی کے اندر اختلافات پیدا کرنے کی دانستہ کوشش کی جا رہی ہے، اس وقت ذاتی اختلافات کو ختم کر کے ساری توجہ تحریک پر مرکوز رکھنے کی ضرورت ہے۔ جو اختلافات پیدا کرے گا میں اسے خود دیکھ لوں گا۔
یہ بات ان کی ہمشیرہ علیمہ خان نے عمران خان سے اڈیالہ جیل میں ملاقات کے بعد میڈیا سے گفتگو کرتے ہوئے کہی۔ ان کے ہمراہ عظمیٰ خان اور نورین خان بھی موجود تھیں۔
یہ بھی پڑھیں: عالیہ حمزہ معافی مانگیں ورنہ کارروائی ہوگی، سلمان اکرم راجا برس پڑے
علیمہ خان نے بتایا کہ عمران خان نے ملاقات کے دوران دو اہم پیغامات دیے، ایک یہ کہ ان کے اور ان کی اہلیہ بشریٰ بی بی کے ساتھ جیل میں انتہائی غیر انسانی سلوک کیا جا رہا ہے۔ ’میرے ساتھ جو برتاؤ کیا جا رہا ہے، اس کا حساب ہونا چاہیے۔‘
علیمہ خان کے مطابق عمران خان نے کہا ہے کہ جیل کے سپرنٹنڈنٹ اور ایک کرنل کی سربراہی میں ان کے بنیادی انسانی حقوق پامال کیے جا رہے ہیں، اور یہ سب کچھ ایک فردِ واحد کی ایما پر ہو رہا ہے۔
عمران خان نے کہاکہ لاہور اجلاس کو بنیاد بنا کر پارٹی کے اندر انتشار پھیلانے کی کوشش کی جا رہی ہے، حالانکہ 300 پارلیمنٹیرینز کا متفقہ طور پر اجلاس میں شرکت کرنا ایک مثبت قدم تھا۔
انہوں نے متنبہ کیا کہ جو کوئی بھی پارٹی میں اختلافات پیدا کرے گا، اسے وہ خود دیکھیں گے۔ ’ہم جیلوں میں قید ہیں اور باہر اختلافات پیدا کیے جا رہے ہیں، یہ مناسب نہیں۔‘
علیمہ خان نے مزید کہاکہ ان کی فیملی گزشتہ 2 سال سے جیلوں کے چکر لگا رہی ہے اور وہ پارٹی کے ہر فیصلے کے ساتھ کھڑی ہے۔ ’اب وقت ہے کہ عمران خان کے دیے گئے پیغامات پر عملدرآمد کیا جائے اور ان کی رہائی کے لیے راہ ہموار کی جائے۔‘
انہوں نے کہاکہ عمران خان چاہتے ہیں کہ پارلیمنٹیرینز واضح کریں کہ آیا وہ سیاست میں رہنا چاہتے ہیں یا نہیں۔ ’مذاکرات کس چیز پر کرنے ہیں؟ پہلے ان کے مقدمات سنے جائیں تو بات ختم ہو جائے گی۔‘
اس موقع پر اپوزیشن لیڈر پنجاب اسمبلی ملک احمد خان بچھر نے کہا کہ پارٹی کی تحریک 5 اگست تک لاہور میں جاری رہے گی۔
انہوں نے بتایا کہ اسپیکر سے 26 ارکانِ اسمبلی سے متعلق ملاقات بھی ہوئی ہے۔ اپوزیشن کو احتجاج سے نہیں روکا جا سکتا۔
یہ بھی پڑھیں: ’اب مذاکرات نہیں ہوں گے‘، عمران خان نے حکومت مخالف تحریک کے لیے تاریخ کا اعلان کردیا
پی ٹی آئی کے سیکریٹری جنرل سلمان اکرم راجا نے کہاکہ عمران خان کی واضح ہدایت ہے کہ لاہور اجلاس پر میڈیا سے کھل کر بات کی جائے۔ پارٹی میں ٹکٹ پیسے کی بنیاد پر نہیں دیے جائیں گے، ہمیں اب متحد ہو کر آگے بڑھنا ہے۔
