برطانیہ کی ملکہ کمیلا کو ‘وائس ایڈمرل آف دی یونائیٹڈ کنگ ڈم’ کا اعزازی خطاب دیا گیا ہے جس کے بعد وہ یہ اعزاز پانے والے برطانیہ کی پہلی شاہی خاتون اور شاہی شخصیت بن گئی ہیں۔
اس سے ایک دن قبل انہیں اسٹیشنرز اینڈ نیوزپیپر میکرز کی تاریخی تنظیم کی اعزازی رکنیت دی گئی تھی اور 24 گھنٹے کے اندر اس دوسرے اعزاز سے نوازا گیا۔
یہ بھی پڑھیے: برطانیہ کی نئی ملکہ کمیلا کون ہیں؟
برطانوی بحریہ کے مطابق سب میرین سروس کے سربراہ ریئر ایڈمرل اینڈی پرکس ملکہ کو باقاعدہ طور پر یہ اعزاز پیش کریں گے۔
ملکہ کمیلا 2007 سے برطانیہ کی ایچ ایم ایس اسٹیوٹ آبدوز کی نامزد خاتون اسپانسر ہیں اور تب سے وہ اس آبدوز سے مسلسل رابطے میں ہیں۔ اب وہ اس تقریب میں اس آبدوز کے 135 رکنی عملے کے ساتھ مل کر اس کی 15 سالہ ابتدائی کمیشن کی تکمیل کا جشن منائیں گی۔
واضح رہے کہ ان سے قبل آخری ‘وائس ایڈمرل آف دی یونائیٹڈ کنگڈم’ کا اعزاز ایڈمرل لارڈ بوئس کو حاصل تھا جن کا انتقال 2022 میں ہوا۔ ان سے پہلے یہ اعزاز سر ڈونلڈ گوسلنگ کو ملا تھا، جنہیں 2012 میں ملکہ الزبتھ دوم نے نامزد کیا تھا۔
برطانوی آبدوزز ایچ ایم ایس اسٹیوٹ کے کمانڈر کمانڈر کرسٹوفر بیٹ نے کہا ہے کہ ملکہ کمیلا نے ہمارے کام کے ہر پہلو میں ہمیشہ دلچسپی اور عزم دکھایا ہے۔ وہ شروع سے ہمارے ساتھ ہیں۔
