اسرائیلی پولیس نے مبینہ طور ایرانی ایجنٹوں کے ساتھ رابطے اور معلومات کی فراہمی کے الزام میں اپنے ایک فوجی کو گرفتار کرکے فرد جرم عائد کردیا ہے۔
پولیس نے دعویٰ کیا ہے کہ مذکورہ فوجی نے ایرانی ایجنٹس سے جان بوجھ کر رابطہ رکھا اور ان کے لیے سرگرمیاں انجام دیں جن میں اسرائیل میں میزائل حملوں اور ان کے اثرات کی ویڈیوز اور تصاویر فراہم کرنا شامل ہے۔
یہ گرفتاری اسرائیلی حکومت کی جانب سے حال ہی میں شروع کی گئی ایک نئی مہم کے بعد سامنے آئی ہے جس میں شہریوں کو ایران کے لیے جاسوسی سے خبردار کیا گیا ہے۔
یہ بھی پڑھیے: 100 سے زائد ایرانی عہدیداروں سے تعلق کا الزام، کیا فرانسیسی صحافی کیتھرین شکدم جاسوس تھی؟
اسرائیلی حکام کا کہنا ہے کہ گزشتہ ایک سال کے دوران ایران کی جانب سے جاسوس بھرتی کرنے کی 25 سے زائد کوششیں بے نقاب کی گئی ہیں، جن میں 35 سے زیادہ افراد پر سنگین سیکیورٹی الزامات کے تحت فرد جرم عائد کی گئی ہے۔
اسرائیل کے قومی عوامی سفارتی ڈائریکٹوریٹ اور ملکی خفیہ ادارے شین بیت کی جانب سے جاری مہم میں کہا گیا کہ یہ مہم قومی سلامتی کے لیے نہایت اہم ہے خاص طور پر ایران کے ساتھ حالیہ جنگ کے بعد جب ایران کی جانب سے اسرائیل میں کارروائیوں اور بھرتی کی کوششوں میں اضافہ متوقع ہے۔
مہم کے ایک ویڈیو اشتہار میں کہا گیا ہے کہ صرف 5 ہزار شیکل کے لیے کیا آپ اپنی زندگی یا خاندان کو تباہ کرنا چاہتے ہیں؟
اسرائیلی سیکیورٹی اداروں کے مطابق غزہ جنگ کے بعد ایران سے منسلک جاسوسی کی سازشوں سے متعلق گرفتاریوں میں 400 فیصد اضافہ ہوا ہے۔
