ایک نئی سائنسی تحقیق میں انکشاف کیا گیا ہے کہ اگر نیند کی کمی (انسومنیا) کے شکار بزرگ افراد کے جسم میں سوزش (inflammation) موجود ہو، تو ان میں ڈپریشن کا خطرہ 3 گنا بڑھ جاتا ہے۔
یہ تحقیق امریکا کے معروف تحقیقی ادارے UCLA ہیلتھ کے ’کزنز سینٹر فار سائیکونوروامیونولوجی‘ میں کی گئی، جس کی قیادت ڈاکٹر مائیکل اروِن نے کی۔ تحقیق کے نتائج معروف طبی جریدے JAMA Psychiatry میں شائع ہوئے ہیں۔
ڈاکٹر اروِن کا کہنا ہے کہ انسومنیا نہ صرف بزرگ افراد کی نیند چھین لیتا ہے بلکہ ان کے مدافعتی نظام کو اس انداز میں متحرک کر دیتا ہے کہ جب جسم میں سوزش پیدا ہو، تو وہ ڈپریشن کا شکار ہونے کے لیے غیرمعمولی طور پر حساس ہو جاتے ہیں۔
مزید پڑھیں: کون سے مسالے پرسکون نیند کے حصول میں مدد دے سکتے ہیں؟
انہوں نے زور دیا کہ ایسے افراد کے لیے ایسی تھراپیز یا علاج تیار کیے جائیں جو سوزش سے وابستہ ڈپریشن کو روک سکیں، تاکہ ان کی مجموعی زندگی کے معیار میں بہتری لائی جا سکے۔
مطالعے کے لیے 60 سال یا اس سے زائد عمر کے 160 افراد کو منتخب کیا گیا، جن میں سے 53 کو انسومنیا لاحق تھا۔ شرکا میں سے قریباً نصف کو ایک خاص بیکٹیریا سے تیار کردہ ’اینڈوٹاکسن‘ دیا گیا، جس کا مقصد جسم میں عارضی سوزش پیدا کرنا تھا۔
نتائج سے ظاہر ہوا کہ سوزش کا شکار انسومنیا کے مریض ڈپریشن کی علامات ظاہر کرنے میں 3 گنا زیادہ حساس ثابت ہوئے، بنسبت اُن افراد کے جو پرسکون نیند لیتے تھے مگر سوزش کا شکار تھے۔
