الیکشن کمیشن آف پاکستان نے قومی اور صوبائی اسمبلی کے 3 حلقوں میں ضمنی انتخابات کے لیے شیڈول جاری کردیا ہے، پولنگ 18 ستمبر کو ہوگی۔
ترجمان الیکشن کمیشن کے مطابق قومی اسمبلی کے حلقے این اے 66 وزیرآباد، این اے 129 لاہور اور پنجاب اسمبلی کے حلقے پی پی 87 میانوالی میں ضمنی انتخابات 18 ستمبر 2025 کو منعقد ہوں گے۔
یہ بھی پڑھیں: الیکشن کمیشن نے ممبر قومی اسمبلی عبداللطیف چترالی کو نااہل قرار دیدیا
ترجمان کے مطابق این اے 66 وزیرآباد کی نشست احمد چٹھہ جبکہ پی پی 87 میانوالی کی نشست پنجاب اسمبلی میں اپوزیشن لیڈر احمد خان بھچر کے نااہل قرار دیے جانے کے باعث خالی ہوئی۔ این اے 129 لاہور کی نشست رکن قومی اسمبلی میاں اظہر کے انتقال کے بعد خالی ہوئی تھی۔
جاری کردہ شیڈول کے تحت امیدوار 6 اگست تک کاغذات نامزدگی جمع کراسکیں گے، جبکہ امیدواروں کے ناموں کی عبوری فہرست 7 اگست کو جاری کی جائے گی۔ 26 اگست کو امیدواروں کو انتخابی نشانات الاٹ کیے جائیں گے۔
یہ بھی پڑھیں: الیکشن کمیشن نے بیرسٹر گوہر کے بیان کو بے بنیاد قرار دے دیا
الیکشن کمیشن نے ہدایت جاری کی ہے کہ امیدوار مقررہ تاریخوں کے مطابق اپنے کاغذات نامزدگی جمع کرائیں تاکہ انتخابی عمل بروقت اور شفاف طریقے سے مکمل کیا جا سکے۔
سینیٹ کی نشست ضمنی انتخابات
دوسری جانب سینٹر اعجاز چوہدری کی نااہلی سے خالی سینٹ کی نشست پر بھی ضمنی انتخاب کا شیڈول جاری کردیا گیا ہے، پنجاب سے سینٹ کی نشست پر ضمنی انتخاب کے لیے پولنگ21 اگست کو ہوگی۔
کاغذات نامزدگی یکم سے 2 اگست تک جمع کروائے جاسکیں گی، کاغذات نامزدگی کی جانچ پڑتال 5 اگست کو ہوگی، کاغذات نامزدگی 13 اگست تک واپس لیے جا سکیں گے، پولنگ صبح نو بجے سے شام چار بجے تک پنجاب اسمبلی کی عمارت میں ہوگی۔
