کراچی کے گلبرگ ٹاؤن میں تعلیم کے فروغ کی جانب ایک تاریخی قدم اٹھایا گیا ہے۔ گورنمنٹ بہادر یار جنگ اسکول، فیڈرل بی ایریا بلاک 11 کو مکمل بحال کر کے ماڈل اسکول کا درجہ دیا گیا۔
چیئرمین گلبرگ ٹاؤن نصرت اللہ کا کہنا ہے کہ فیڈرل بی ایریا کے تمام سرکاری اسکولوں کو مرحلہ وار مکمل بحال کیا جائے گا، ہم اکیڈمیکس پر بھرپور کام کر رہے ہیں اور اساتذہ کو جدید دور کے تقاضوں کے مطابق تربیت دی جائے گی، خصوصاً مصنوعی ذہانت (AI) اور لٹریسی جیسے اہم شعبوں میں۔
انہوں نے کہا کہ تعلیم کارڈ صرف ایک سہولت نہیں بلکہ ایک تعلیمی انقلاب کی بنیاد ہے. بہادر یار جنگ اسکول کی بحالی کے ساتھ ساتھ، جدید تعلیمی ماحول کو یقینی بنانے کے لیے متعدد سہولیات بھی فراہم کی گئی ہیں، جن میں کمپیوٹر لیب، باسکٹ بال کورٹ، بچوں کے لیے جھولے، کشادہ کھیل کا میدان اور ایک محفوظ و دلکش عمارت شامل ہے۔
ان سہولیات کا مقصد بچوں کو نہ صرف معیاری تعلیم فراہم کرنا ہے بلکہ ان کی جسمانی، ذہنی اور تخلیقی صلاحیتوں کو بھی نکھارنا ہے۔
نصرت اللہ نے اپنی 2 سالہ کارکردگی کا ذکر کرتے ہوئے کہا ہے کہ سڑکوں کی مرمت و کارپیٹنگ، پبلک اسکولز کی اپ گریڈیشن، اوپن ایئر جم، پارکس اور فواروں کی بحالی، صاف پانی و سیوریج نظام کی بہتری، اسٹریٹ لائٹس کی تنصیب، رین واٹر ہارویسٹنگ، صفائی مہمات اور ’شائننگ اسٹارز فیسٹیول‘ جیسے اقدامات شامل ہیں۔
ان کا کہنا تھا کہ گلبرگ ٹاؤن کو ایک ترقی یافتہ، صاف ستھرا اور تعلیم دوست ماڈل بنانا ان کا مشن ہے۔
