وزیراعلیٰ خیبرپختونخوا علی امین گنڈاپور نے واضح کیا ہے کہ چیئرمین تحریک انصاف عمران خان نے نہ کبھی ملک چھوڑنے کی خواہش ظاہر کی اور نہ ہی ایسا سوچا، وہ ہر حال میں پاکستان میں ہی رہنے کا عزم رکھتے ہیں۔
یہ بھی پڑھیں: عمران خان نے خود جلاوطنی کی درخواست کی، ہم نے مسترد کیا، وزیرِ مملکت حذیفہ رحمان کا انکشاف
معروف قومی اخبار روزنامہ جنگ کو دیے گئے خصوصی انٹرویو میں علی امین گنڈاپور نے کہا کہ ملک میں بعض عناصر سازشی مفروضے پھیلا کر تحریک انصاف کو کمزور کرنے کی کوشش کررہے ہیں۔ ان کے بقول ’عمران خان نے ہمیشہ کہا ہے کہ پاکستان سے باہر نہیں جاؤں گا، اور انہی کے اعتماد کی بنیاد پر میں وزیراعلیٰ کے منصب پر موجود ہوں۔‘
انہوں نے دعویٰ کیا کہ بانی پی ٹی آئی عمران خان کو کمزور کرنے والے دراصل مخالفین کے ایجنڈے پر کام کررہے ہیں، وہ تحریک کا حصہ نہیں بلکہ سازشوں کا آلہ کار ہیں۔
ملک میں جاری سیکیورٹی صورتحال پر بات کرتے ہوئے علی امین گنڈاپور نے کہاکہ مسائل کا حل صرف مذاکرات میں ہے، طاقت کے استعمال سے پہلے بھی کامیابی نہیں ملی۔ ان کے مطابق دہشتگردی کے خاتمے کے لیے عوام کا اعتماد حاصل کرنا ناگزیر ہے۔ ’اعتماد کے بغیر نہ جنگ جیتی جا سکتی ہے نہ امن قائم کیا جا سکتا ہے۔‘
انہوں نے اس بات پر بھی زور دیا کہ پاکستان کو افغانستان کے ساتھ تعلقات بہتر بنانے کی فوری ضرورت ہے کیونکہ خطے میں امن انہی تعلقات سے جڑا ہوا ہے۔
یہ بھی پڑھیں: عمران خان نے ڈیل کی آفر لے جانے پر علی امین پر جوتی اٹھا لی تھی، سہیل وڑائچ کا انکشاف
ان کا کہنا تھا کہ ترقی کا خواب صرف اس وقت ممکن ہے جب ملک میں امن ہو، اور امن کے لیے ضروری ہے کہ حکومت، ادارے اور عوام ایک پیج پر ہوں۔ ’جب مسائل پر بات نہیں کی جاتی تو چھوٹے چھوٹے مسائل کینسر بن جاتے ہیں، ہمیں کھل کر مکالمہ کرنا ہوگا۔‘
