بالی ووڈ اداکار نوازالدین صدیقی نے کہا ہے کہ سلمان خان، عامر خان اور شاہ رخ خان کے ساتھ کام کرنے کے بعد ان کے ساتھ مضبوط رشتہ قائم ہو گیا ہے، جب بھی کوئی اچھے اسکرپٹ پر مبنی فلم ہو تو تینوں خانز انہیں فون کرتے ہیں۔
نوازالدین صدیقی ان چند اداکاروں میں سے ایک ہیں جنہیں اپنے کیریئر میں تینوں خانز کے ساتھ کام کرنے کا موقع ملا۔
1999میں انہوں نےعامر خان کی فلم ’سرفروش‘ میں ایک چھوٹے سے کردار سےبالی ووڈ میں قدم رکھا تھا
اداکار نے سلمان خان کے ساتھ کِک 2014اور کبیر خان کی فلم بجرنگی بھائی جان2015 میں کام کیا۔
نوازالدین صدیقی نے عامر خان کے ساتھ ریما کاگتی کی فلم تلاش2012میں کام کیا اور پیپلی لائیو2010میں بھی کام کیا جس کےپروڈیوسر عامر خان تھے۔
2017میں اداکار نے راہول ڈھولکیا کی فلم رئیس میں شاہ رخ خان کے ساتھ کام کیا۔
48سالہ اداکار نے ایک انٹرویو میں تینوں خانز کے ساتھ کام کرنے کے اپنے تجربے کے بارے میں بتایا۔انہوں نے کہا کہ ان کے ساتھ کام کرنا ایک بہت ہی پُرلطف تجربہ رہا۔
ان کا کہنا تھا کہ یہ ان کی عظمت ہے چاہے شاہ رخ ہو، سلمان ہو یا عامر جب بھی اچھے اسکرپٹ پر مبنی فلم ہوتی ہے تو وہ انہیں فون کرتے ہیں۔ اس کی وجہ یہ ہے کہ وہ انہیں اور ان کے کام کو جانتے ہیں۔ وہ انہیں ذاتی طور پر جانتے ہیں اسی وجہ سےتینوں خانز کے ساتھ رشتہ مضبوط ہے۔
انہوں نے مزید کہا کہ ان سے سیکھنے کے لیے بہت کچھ ہے۔
اداکار نوازالدین صدیقی آخری بار سدھیر مشرا کی فلم ’افواہ‘ میں بھومی پیڈ نیکر کے ساتھ نظر آئے تھے۔
اداکار کی فلم جوگیرا سارا را را12مئی کو ریلیز ہونا تھی۔ کشن نندے کی ہدایت کاری میں بننے والی اس فلم میں اداکارہ نیہا شرما بھی ہیں لیکن ’دی کیرالہ اسٹوری‘ کی باکس آفس پر کامیابی کے بعد اسے 26مئی تک ملتوی کر دیا گیا ہے۔
