پاکستان اور ترکیہ کی بحری افواج کی اسپیشل فورسز کے مابین پہلی دو طرفہ مشق کامیابی کے ساتھ مکمل ہو گئی۔ یہ مشق دونوں برادر ممالک کے مابین بحری تعاون اور آپریشنل ہم آہنگی کو مضبوط بنانے کی سمت ایک اہم پیش رفت قرار دی جا رہی ہے۔
یہ بھی پڑھیں: آزمائش کی گھڑی میں پاکستان ترکیہ کے ساتھ ہے‘ شہبازشریف کا طیب اردوان کو فون
ترجمان پاک بحریہ کے مطابق مشق کے دوران کئی تربیتی سرگرمیاں انجام دی گئیں، جن میں مختلف اقسام کے ہتھیاروں کی فائرنگ، خشکی اور سمندر میں مشترکہ آپریشنز اور شہری علاقوں میں فوجی کارروائیوں کے عملی مظاہرے شامل تھے۔
ان مشقوں میں لائیو فائرنگ کے ساتھ جنگی حالات پر مبنی آپریشنز بھی شامل تھے، جن کا مقصد ساحلی علاقوں میں مشترکہ کاررروائیوں کی تیاری اور حکمت عملی کو مزید مؤثر بنانا تھا۔
ترجمان نے بتایا کہ مشق کا اختتام ایک مخصوص ساحلی علاقے میں جامع ڈرل پر ہوا، جس میں دونوں فورسز نے خشکی اور سمندر میں درپیش خطرات سے نمٹنے کی مشق کی۔
اس مشق نے دونوں ممالک کی بحری افواج کی آپریشنل تیاری اور حربی مہارتوں کا عملی مظاہرہ پیش کیا۔
یہ بھی پڑھیں: پاکستان اور ترکیہ کے تعلقات کو مزید مستحکم کرنے کے لیے مشترکہ کمیشن کا قیام
ترجمان کے مطابق اس مشق کا انعقاد پاکستان اور ترکیہ کے دیرینہ اور مضبوط دفاعی تعلقات کا عملی ثبوت ہے، جو اس امر کی تصدیق کرتا ہے کہ دونوں ممالک علاقائی امن اور استحکام کے لیے مشترکہ اقدامات میں پُرعزم ہیں۔
