قومی اسمبلی میں قائد حزب اختلاف محمود خان اچکزئی نے کہا ہے کہ ہم حکومت کے ساتھ ہیں، اس تاریخی کامیابی پر بھی جو خوش نہ ہو وہ پاگل ہی ہوگا۔
قومی اسمبلی میں خطاب کرتے ہوئے انہوں نے کہاکہ تمام اکابرین کو ایک جگہ بیٹھ کر مشاورت کرنی چاہیے۔
انہوں نے کہا کہ اختلافات جتنے بھی ہوں، موجودہ حالات میں ہمیں حکومت کے ساتھ کھڑا ہونا چاہیے اور ہم حکومت کی غیر مشروط حمایت کرتے ہیں۔
انہوں نے کہاکہ اس وقت عالمی حالات خاص طور پر ٹرمپ کی انا مسئلہ ہے، وہ سمجھتے تھے کہ ایران سرینڈر کر جائے گا، لیکن ایسا نہیں ہوا۔
قائد حزب اختلاف نے پاکستان کی نعمتوں کی طرف بھی توجہ دلائی اور کہاکہ یہ موقع آسمان سے آیا ہے، اسے ضائع نہیں کرنا چاہیے۔
انہوں نے پاکستان تحریکِ انصاف کے بانی عمران خان کے بارے میں بھی بات کی اور کہاکہ عمران خان اس ملک کے رہنے والے ہیں، جیل میں ان سے ملاقات کر کے انہیں اپنے مؤقف پر راضی کیا جائے گا۔
انہوں نے کہاکہ اب تک جتنی بھی تحریکیں ملی ہیں، عمران خان جتنی مقبولیت کسی کو نہیں ملی، ان کو جیل میں ڈالنا جرم ہے۔
محمود اچکزئی نے حکومت کی حمایت کرتے ہوئے پاکستان زندہ باد اور پاک فوج زندہ باد کا نعرہ بھی لگایا۔
