پاکستان تحریک انصاف (پی ٹی آئی) کے چیئرمین بیرسٹر گوہر نے کہا ہے کہ کمپرومائزڈ کا لفظ ہماری ڈکشنری میں نہیں۔ پارٹی ارکان نے بھاری مالی پیشکشیں رد کرکے وفاداری کا ثبوت دیا ہے۔
یہ بھی پڑھیں: پی ٹی آئی احتجاج: کارکنوں نے علی امین گنڈاپور کے سامنے ڈی چوک جانے کے نعرے لگا دیے
میڈیا سے گفتگو کرتے ہوئے بیرسٹر گوہر نے کہاکہ پی ٹی آئی کے کئی ارکان پر 50 سے زیادہ مقدمات ہیں، وہ پہلے ہی بڑی قربانیاں دے رہے ہیں۔ ان کے سامنے ایک طرف وزارتیں، کمیٹیوں کی چیئرمین شپ اور مقدمات ختم کرنے کی پیشکشیں تھیں، جب کہ دوسری طرف مقدمات اور مصیبتیں، اس کے باوجود ہمارے ارکان نے استقامت کا مظاہرہ کیا۔
انہوں نے مزید کہاکہ آج بھی بیشتر پارٹی کارکن کرائے کے گھروں میں زندگی گزار رہے ہیں، لیکن اس کے باوجود انہوں نے وفاداری کو ترجیح دی۔ ہم بانی چیئرمین عمران خان کے ساتھ تھے، ہیں اور رہیں گے، اور ہمیں اپنے ارکان پر فخر ہے۔
ضمنی انتخابات کے حوالے سے بیرسٹر گوہر نے واضح کیاکہ کسی بھی فیصلے سے قبل عمران خان سے مشاورت کی جائے گی، اور پی ٹی آئی پارلیمنٹ کا حصہ بنی رہے گی۔
انہوں نے یہ بھی کہاکہ 5 اگست کو پی ٹی آئی کی جانب سے ملک بھر میں کیے جانے والے احتجاج مؤثر اور کامیاب ثابت ہوئے، ہر ضلع میں عوام سڑکوں پر نکلے اور پارٹی سے اظہارِ یکجہتی کیا۔
یہ بھی پڑھیں: پی ٹی آئی رہنما شیخ وقاص کی قومی اسمبلی کی سیٹ خطرے میں، مگر کیوں؟
آخر میں ان کا کہنا تھا کہ بونیر، صوابی اور مالاکنڈ سمیت متعدد حلقوں میں پارٹی ارکان کو مخصوص ذمہ داریاں سونپی گئی ہیں، اور وہ اپنی ڈیوٹیاں پوری دیانت داری سے ادا کریں گے۔
