چین میں ایک کم عمر لڑکے نے محض ایک وائرل لیبوبو گڑیا نہ ملنے پر اپنے رشتے دار کے گھر میں ایسا ہنگامہ برپا کر دیا کہ لاکھوں یوآن کا نقصان ہو گیا۔ لیبوبو گڑیا حالیہ برسوں میں عالمی سطح پر شہرت اختیار کرچکی ہے، جسے ریانا، دوا لیپا اور بلیک پنک کی لیزا جیسی مشہور شخصیات بھی پسند کرتی ہیں۔
ساوتھ چائنا مارننگ پوسٹ کے مطابق لڑکے نے رشتے دار کے گھر میں ایک لیبوبو گڑیا دیکھی، جو مہنگے زیورات سے سجی ہوئی تھی، اور اسے حاصل کرنے کی ضد کی۔ گھر والوں کے انکار پر بچے نے ایک ریموٹ کنٹرول اٹھا کر شیشے کی چھت پر دے مارا، جس سے 1 لاکھ یوآن مالیت کا پینل ٹوٹ گیا۔
یہ بھی پڑھیے کامیڈین بھارتی سنگھ نے بیٹے کی لیبوبو ڈول کو کیوں جلا دیا؟
ریموٹ کنٹرول لگنے کے بعد قریب ہی لٹکا ہوا ایک قیمتی اطالوی کرسٹل جھاڑ فانوس، جس کی قیمت 3 لاکھ یوآن تھی، زمین پر آ گرا اور چکنا چور ہو گیا۔
بعد کی صورتحال
یہ واقعہ ایک چینی انفلوئنسر نے شیئر کیا اور بتایا کہ صرف شیشے کی چھت کی مرمت کے لیے تمام پینلز کو ہٹانا اور دوبارہ لگانا پڑے گا۔ رشتہ داروں کا اس قدر زیادہ نقصان کرنے کے باوجود بچے نے اپنے رویے سے کوئی ندامت ظاہر نہیں کی۔
بچے کے والدین نے مالی مشکلات کا حوالہ دیتے ہوئے محض 20 ہزار یوآن ہرجانے کی پیشکش کی، وہ بھی 2 قسطوں میں۔
ان کا کہنا تھا ’ہم غریب ہیں۔ گھر کا سارا سامان بیچ کر بھی ہم صرف 20 ہزار یوآن ہی دے سکتے ہیں۔‘
