معروف امریکی گلوکارہ میڈونا نے پوپ لیو سے اپیل کی ہے کہ وہ جلد از جلد غزہ کا دورہ کریں، جہاں اسرائیلی حملوں میں سب سے زیادہ بچے متاثر ہو رہے ہیں۔
انسٹاگرام پر جاری پیغام میں میڈونا نے کہا کہ ایک ماں ہونے کے ناتے بچوں کی یہ تکلیف برداشت نہیں کر سکتی، بچے سب کے ایک جیسے ہوتے ہیں اور آپ وہ واحد شخص ہیں جنہیں اندر جانے سے روکا نہیں جا سکتا۔ انہوں نے زور دیا کہ انسانی امداد کی راہیں کھولی جائیں تاکہ بے گناہ اور معصوم بچوں کی جانیں بچائی جا سکیں، کیونکہ وقت بہت کم رہ گیا ہے۔
مزید پڑھیں: 2 سو سال کی جنگوں سے زیادہ صحافی غزہ میں مارے گئے، جیکسن ہنکل
میڈونا نے کہا کہ سیاست مسائل حل نہیں کر سکتی بلکہ شعور ہی تبدیلی لا سکتا ہے، اس لیے وہ پوپ لیو سے مدد کی درخواست کر رہی ہیں۔ انہوں نے اپنے بیٹے روکو کی سالگرہ پر سب سے بڑا تحفہ یہی سمجھا کہ دنیا سے اپیل کریں کہ غزہ کے متاثرہ بچوں کی مدد کی جائے۔
انہوں نے عالمی اداروں کو ٹیگ کرتے ہوئے کہا کہ جو لوگ مدد کرنا چاہتے ہیں، وہ امدادی تنظیموں کو چندہ دیں، کیونکہ وہ غزہ کے بچوں کو بھوک سے مرتا ہوا نہیں دیکھ سکتیں۔
View this post on Instagram
واضح رہے کہ اسرائیل کی جارحیت کے باعث غزہ میں انسانی امداد کی ترسیل ممکن نہیں ہو پا رہی، جس سے قحط اور بھوک کا خطرہ سنگین ہو گیا ہے۔ اقوام متحدہ اور عالمی ادارہ صحت بھی اس صورتحال کو خطرناک قرار دے چکے ہیں اور خبردار کیا ہے کہ اب تک بھوک سے سینکڑوں بچوں سمیت متعدد افراد جان کی بازی ہار چکے ہیں۔
