وزیراعظم پاکستان شہباز شریف نے یوم آزادی اور معرکہ حق کی تقریب سے خطاب میں تمام سیاسی جماعتوں کو ’میثاق استحکام پاکستان‘ میں شامل ہونے کی دعوت دی۔
تقریب سے خطاب کرتے ہوئے انہوں نے کہاکہ ملک میں سب کو سیاست کرنے کا حق حاصل ہے، مگر کسی کو بغاوت، جلاؤ گھیراؤ یا توہین کرنے کا حق نہیں۔
یہ بھی پڑھیں: اپوزیشن میثاق معیشت پر متفق ہوجائے تو پاکستان کی اڑان یقینی ہے، رانا ثنااللہ
انہوں نے کہاکہ تنقید کا حق سب کو ہے لیکن توہین کی کوئی گنجائش نہیں، حکومت پاکستان کو باوقار فلاحی ریاست بنانے اور روشن مستقبل کی طرف لے جانے کے عزم پر کاربند ہے۔
وزیراعظم نے شہدا کو خراج عقیدت پیش کرتے ہوئے تحریک پاکستان کے تمام قائدین کو سلام بھی پیش کیا اور کہاکہ 14 اگست کی آزادی صرف ایک دن کا جشن نہیں بلکہ دو قومی نظریے کی جنگ کی کامیابی کی علامت ہے۔
انہوں نے کہاکہ قائداعظم محمد علی جناح کی بہادری اور قیادت نے تاریخ اور جغرافیہ بدل دیا، جب 14 اگست 1947 کو پاکستان دنیا کے نقشے پر ابھر کر سامنے آیا۔
وزیراعظم نے کہاکہ حال ہی میں بھارت نے طاقت کے گھمنڈ میں پاکستان پر حملہ کیا لیکن ہمارے بہادر مسلح افواج نے بھارت کے غرور کو صرف 4 دن میں خاک میں ملا دیا گیا۔
وزیراعظم نے حالیہ بھارتی حملے پر بات کرتے ہوئے کہا کہ فیلڈ مارشل سید عاصم منیر نے بھارت کے جنگی جنون کے خلاف جس حکمت عملی سے پاکستان کو کامیابی دلائی، اس کا اعتراف دوست اور دشمن سب کرتے ہیں۔ ’جس طرح 14 اگست 1947 کو پاکستان دنیا کے نقشے پر ابھر کر سامنے آیا ایسے ہی 25 مئی 2025 کو بھی ایک نئی قوم ابھر کر سامنے آئی۔‘
وزیراعظم نے عالمی اور خطے کے ممالک کے تعاون کا بھی ذکر کرتے ہوئے کہاکہ چین، سعودی عرب، ترکیہ، قطر، ایران، یو اے ای، آذربائیجان نے پاکستان کے موقف کی حمایت کی۔
انہوں نے امریکی صدر ڈونلڈ ٹرمپ کا بھی شکریہ ادا کیا جنہوں نے جنگ بندی کے لیے کردار ادا کیا۔ ان کا کہنا تھا کہ امید ہے امریکی صدر مسئلہ کشمیر کے حل کے لیے کردار ادا کریں گے۔
انہوں نے ملکی معیشت میں بہتری، اسٹاک ایکسچینج کی بلندی اور شرح سود میں کمی کا حوالہ دیتے ہوئے کہاکہ یہ سب اللہ کے فضل اور سیاسی و عسکری قیادت کے اتفاق کی وجہ سے ممکن ہوا ہے، محنت اور دیانت سے ملک کو عظیم فلاحی اسلامی ریاست بنائیں گے۔
وزیراعظم نے کہاکہ امریکا کے ساتھ حالیہ تجارتی معاہدے میں جہاں حکومتی ٹیم نے بھرپور کردار ادا کیا وہیں فیلڈ مارشل سیّد عاصم منیر کا بھی اس میں بہت کردار شامل ہے۔
وزیراعظم نے اوورسیز پاکستانیوں کے مالی تعاون کو بھی سراہا، جس سے ملکی ترقی میں نمایاں کردار ادا ہوا ہے۔
یہ بھی پڑھیں: میثاق معیشت کس صورت میں ممکن، تحریک انصاف نے کڑی شرط بتادی
وزیراعظم شہباز شریف نے اپنے خطاب میں آرمی راکٹ فورس کمانڈ کی تشکیل کا اعلان کردیا۔
انہوں نے کہاکہ آرمی راکٹ فورس کمانڈ پاکستان کی جنگی صلاحیت کو مزید مضبوط کرےگی۔
