14 اگست وہ دن ہے جب برصغیر کے مسلمانوں کا خواب پاکستان کی صورت میں حقیقت بنا۔ یومِ آزادی محض جشن نہیں بلکہ قربانیوں اور جدوجہد کی عظیم داستان ہے۔
یومِ آزادی معرکۂ حق پر شہداء کے اہلِ خانہ نے وطن کے نام خصوصی پیغام دیے۔
لانس نائیک عامر عباس شہید کے بھائی نے کہا کہ 14 اگست وہ دن ہے جب بے مثال قربانیوں اور جدوجہد کے بعد پاکستان آزاد ہوا۔
یہ بھی پڑھیں:بھارتی جارحیت میں زخمی پاک فوج کے 2 مزید جوان شہید، فوج کے شہدا کی تعداد 13 ہوگئی
انہوں نے مزید کہا کہ یہ دن ہماری آزادی کی یاد، قربانیوں اور ہمت کی داستان ہے۔ یہ دن ہمارے اسلاف کی قربانیوں اور سپاہیوں کی عظمت کو سلام پیش کرتا ہے اور سرحدوں کے نگہبان سپاہیوں کی عظمت کا پیغام دیتا ہے۔
ان کا کہنا تھا کہ افواج پاکستان ہر محاذ پر قوم کے دفاع کے لیے سینہ سپر ہے۔
نائیک ماجد شہید کے بیٹے نے کہا کہ کارگل کی بلندیوں سے سیاچن کے برف پوش میدانوں تک ہمارے جوان ہمیشہ سب سے آگے ہیں۔
یہ بھی پڑھیں:باجوڑ واقعہ: کے پی حکومت کا شہدا اور زخمیوں کے لیے امدادی پیکج کا اعلان
انہوں نے کہا کہ جنگ سے لے کر قدرتی آفات تک عوام کی خدمت میں افواج پاکستان ہمیشہ پیش پیش ہیں، اور یوم آزادی پر اپنے ملک سے محبت اور محافظوں کے لیے دعا ہمارا فرض ہے۔
نائیک ماجد شہید کی بیٹی نے کہا کہ “یوم آزادی پر ان محافظوں کو یاد رکھیں جو آزادی کے لیے جان نچھاور کرتے ہیں۔
ان کا کہنا تھا کہ یہ شہیدوں کی قربانیوں کا صلہ ہے کہ آج ہم آزاد فضا میں سانس لے رہے ہیں اور ہمارا فرض ہے کہ ہم اپنے محافظوں کے لیے دعا کریں جو ہر لمحہ جان قربان کرنے کو تیار ہیں۔
