اسٹیٹ بینک آف پاکستان نے جشنِ معرکہ حق کے موقع پر 75 روپے مالیت کا یادگاری سکّہ جاری کر دیا ہے۔
یہ سکہ وفاقی حکومت کی جانب سے معرکہ حق میں مسلح افواج کی شجاعت کو خراجِ تحسین پیش کرنے اور جشنِ آزادی کے موقع کی مناسبت سے متعارف کرایا گیا ہے۔
یہ بھی پڑھیں: خیبرپختونخوا سیلاب: ایف نائن پارک میں معرکہ حق اور جشن آزادی کے حوالے سے پروگرام ملتوی
سکے کا وزن 13.5 گرام اور قطر 30 ملی میٹر ہے، جبکہ اس میں 79 فیصد تانبہ، 20 فیصد زنک اور ایک فیصد نکل شامل ہے۔
سکے کے سامنے کے رخ پر وسط میں بڑھتا ہوا ہلال اور پانچ نوکوں والا ابھرتا ہوا ستارہ ہے، جس کا رخ شمال مغرب کی سمت ہے۔ ستارے اور ہلال کے اوپر کنارے کے ساتھ اردو میں ’اسلامی جمہوریہ پاکستان‘ کے الفاظ کندہ ہیں۔
چاند کے نیچے اور گندم کی اوپر کی طرف جھکی ہوئی دو بالیوں کے اوپر عددی صورت میں اجرا کا سال 2025 درج ہے۔ ستارے اور ہلال کے دائیں جانب سکّے کی مالیت 75 جلی اعداد میں اور بائیں جانب اردو رسم الخط میں روپیہ درج ہے۔
پچھلے رخ پر وسط میں اردو میں معرکہ حق اور ہندسوں میں 2025 کے الفاظ کندہ ہیں، جبکہ بالائی کنارے پر پاکستان ہمیشہ زندہ باد درج ہے۔ سکے کے پچھلے رخ پر دائیں اور بائیں طرف دو لڑاکا طیارے، ایک بحری جہاز اور ملٹی پل راکٹ لانچر سسٹم ابھار کی شکل میں نمایاں ہیں۔
یہ بھی پڑھیں: جشن آزادی پاکستان: وزیراعظم نے یادگار معرکہ حق ماڈل کی نقاب کشائی کردی
یہ یادگاری سکہ اسٹیٹ بینک بینکنگ سروسز کارپوریشن کے فیلڈ دفاتر کے ایکسچینج کاؤنٹرز پر 15 اگست 2025 سے عوام کے لیے دستیاب ہوگا۔
