لودھراں کے قریب پشاور سے کراچی جانے والی عوام ایکسپریس حادثے کا شکار ہوگئی۔ 2 کوچز پٹری سے اتر گئیں جبکہ لگیج وین سمیت 3 بوگیاں الٹ گئیں۔
یہ بھی پڑھیں:میانوالی سے لاہور جانے والی ٹرین کو حادثہ، 20 مسافر زخمی
اطلاعات کے مطابق حادثے میں ایک مسافر جاں بحق جبکہ 21 زخمی ہوگئے۔
زخمیوں کو طبی امداد کی فراہمی
ریسکیو ذرائع کے مطابق 2 شدید زخمیوں کو بہاولپور اسپتال منتقل کیا گیا جبکہ معمولی زخمیوں کو ڈی ایچ کیو اسپتال لودھراں میں طبی امداد دی جارہی ہے۔
ڈویژنل سپرنٹنڈنٹ ملتان اور میڈیکل ٹیم جائے حادثہ پر پہنچ گئی اور امدادی کاموں میں مصروف ہے۔
وزیر ریلوے کا اظہار افسوس
وفاقی وزیر ریلوے محمد حنیف عباسی نے حادثے کا نوٹس لیتے ہوئے ایک مسافر کے جاں بحق ہونے پر دکھ کا اظہار کیا اور زخمیوں کی جلد صحت یابی کے لیے دعا کی۔
یہ بھی پڑھیں:گھوٹکی : مال گاڑی کی 5 بوگیاں پٹڑی سے اتر نے سے ٹرینوں کی آمدورفت معطل
وزیر نے ہدایت دی کہ متاثرہ مسافروں کو ہر ممکن طبی سہولت فراہم کی جائے۔
ریلوے ٹریک اور مسافروں کا بندوبست
حکام کے مطابق حادثہ والی ٹرین کے مسافروں کو متبادل ٹرین کے ذریعے منزل کی جانب روانہ کر دیا گیا ہے۔
ٹرینوں کو اپ ٹریک سے گزارا جا رہا ہے اور کسی دوسری ٹرین کے متاثر ہونے کی اطلاع نہیں ملی۔ وزیر ریلوے نے ریلوے عملے کو ہدایت دی کہ امدادی کام جلد مکمل کرکے ڈاؤن ٹریک بحال کیا جائے۔
انکوائری کا حکم
وفاقی وزیر ریلوے نے حادثے کی تحقیقات کا حکم دیتے ہوئے سات روز میں رپورٹ پیش کرنے کی ہدایت کر دی۔
