دنیا بھر کے آسمان شناسوں کے لیے 23 اگست 2025 ایک منفرد لمحہ لے کر آرہا ہے، جب نایاب فلکیاتی مظہر بلیک مون نمودار ہوگا۔ یہ واقعہ امریکی مشرقی وقت کے مطابق صبح 2 بجکر 06 منٹ (پاکستانی وقت صبح 11 بجکر 06 منٹ) پر رونما ہوگا۔ تاہم ماہرین کے مطابق یہ منظر عام آنکھ سے دکھائی نہیں دے گا کیونکہ اس دوران چاند کا روشن رخ سورج کی طرف ہوگا اور زمین کی جانب اس کا سیاہ رخ ہوگا۔
یہ بھی پڑھیں: آنے والے بلڈ مون چاند گرہن کے بارے میں 7 عجیب و غریب حقائق کیا ہیں؟
اگر کسی ایک ماہ میں دو نئے چاند آجائیں تو یہ بلیک مون کہلاتا ہے، جو تقریباً ہر 29 مہینے بعد ہوتا ہے۔
جب کسی موسم میں (جیسے گرمی یا خزاں) چار نئے چاند آجائیں تو ان میں تیسرا بلیک مون کہلاتا ہے۔ یہ مظہر تقریباً ہر 33 مہینے بعد رونما ہوتا ہے۔
چونکہ قمری چکر اور شمسی کیلنڈر میں مکمل مطابقت نہیں، اس لیے اکثر موسم میں 3 نئے چاند ہوتے ہیں جبکہ چوتھا غیر معمولی ہوتا ہے، اسی لیے تیسرا نیا چاند بلیک مون قرار پاتا ہے۔
23 اگست کا بلیک مون
یہ مظہر موسمی بلیک مون ہے، یعنی موسمِ گرما میں چار نئے چاند کے آنے کی صورت میں تیسرا۔ اس دوران چاند زمین اور سورج کے درمیان ہوگا، اس لیے یہ دکھائی نہیں دے گا اور رات کا آسمان غیر معمولی طور پر تاریک ہوگا۔
گزشتہ موسمی بلیک مون 19 مئی 2023 کو ہوا تھا، جبکہ اگلا اگست 2027 میں دوبارہ رونما ہوگا، یعنی یہ واقعہ تقریباً ہر 33 مہینے بعد آتا ہے۔
یہ بھی پڑھیں: پاکستان کے افق پر ’گلابی چاند‘ بآسانی کب دیکھا جاسکے گا؟
ماہرین کا کہنا ہے کہ اگرچہ بلیک مون کو براہِ راست دیکھنا ممکن نہیں، لیکن اس شب آسمان غیر معمولی حد تک صاف اور گہرا ہوگا۔ اس موقع پر کہکشاں (Milky Way) اور ستاروں کا شاندار منظر دیکھا جا سکے گا، خاص طور پر ان علاقوں میں جہاں روشنی کم ہو۔
فلکیاتی ماہرین کا کہنا ہے کہ اگرچہ ’’بلیک مون‘‘ فلکیات میں رسمی اصطلاح نہیں ہے، تاہم یہ قمری چکر اور کیلنڈر کے میل کی وجہ سے ایک دلچسپ اور نایاب مظہر سمجھا جاتا ہے۔
