پشاور میں خیبرپختونخوا کے سیلاب متاثرین کی امداد کے لیے کھیلے گئے نمائشی کرکٹ میچ میں پشاور زلمی نے لیجنڈز الیون کو سنسنی خیز مقابلے کے بعد 6 رنز سے شکست دی۔
یہ میچ عمران خان کرکٹ اسٹیڈیم پشاور میں کھیلا گیا، جہاں پشاور زلمی کی ٹیم نے پہلے کھیلتے ہوئے 144 رنز بنائے۔ کپتان بابر اعظم نے 41 رنز کی شاندار اننگز کھیلی، یاسر حمید نے 35 اور عامر برکی نے 24 رنز جوڑے۔
یہ بھی پڑھیں: خیبرپختونخوا کے سیلاب متاثرین کی مدد: پشاور زلمی کا ’فلڈ ریلیف نمائشی میچ‘ کا اعلان
لیجنڈز الیون کی بولنگ میں شاہد آفریدی اور عبدالرزاق نے 3،3 کھلاڑی آؤٹ کیے جبکہ محمد حفیظ اور سعید اجمل نے 2،2 وکٹیں حاصل کیں۔
خیبر پختونخوا حکومت اور پشاور زلمی کا شکریہ کہ اُنہوں نے نا صرف پشاور میں کرکٹ کی رونقیں بحال کیں بلکہ سیلاب زدگان کیلئے اتنے بڑے ایونٹ کا اہتمام کیا
عمران خان کرکٹ اسٹیڈیم میں سینیٹر فیصل جاوید کمنٹری کر رہے ہیںpic.twitter.com/wijWMhot7m
— Shams Khattak (@Sh_am_92) August 30, 2025
ہدف کے تعاقب میں لیجنڈز الیون کی ٹیم 15 اوورز میں 6 وکٹوں کے نقصان پر 138 رنز بنا سکی۔ انضمام الحق نے 23 گیندوں پر 46 رنز اور اظہر محمود نے 34 رنز کی جارحانہ اننگز کھیلیں لیکن ٹیم کو فتح نہ دلا سکے۔
پشاور زلمی کی جانب سے محمد عرفان اور بابر اعظم نے 2،2 وکٹیں حاصل کیں، جبکہ سلمان خان اور ذوالفقار بابر کے حصے میں ایک، ایک وکٹ آئی۔
یہ بھی پڑھیں: ہائیر پاکستان کا بونیر کے سیلاب زدگان کے لیے نوکریوں کا اعلان
یہ میچ پشاور زلمی، ڈائریکٹوریٹ جنرل آف اسپورٹس خیبرپختونخوا اور صوبائی حکومت کے تعاون سے منعقد ہوا، اور اس کی آمدنی سیلاب متاثرین کو دی جائے گی۔ قابل ذکر بات یہ ہے کہ دونوں ٹیموں کے کھلاڑیوں نے میچ فیس وصول کرنے سے انکار کرتے ہوئے اپنی شرکت کو فلاحی مقصد کے لیے وقف کیا۔
