وزیر اعظم میاں محمد شہباز شریف نے پاکستان تحریک انصاف کے چیئرمین عمران خان کی جانب سے چیف آف آرمی اسٹاف جنرل سید عاصم منیر پر الزام تراشی کی شدید مذمت کرتے ہوئے کہا ہے کہ پوری قوم مسلح افواج اور سپہ سالار کے ساتھ کھڑی ہے۔ْ
پرائم منسٹر ہاؤس کی جانب سے جاری کردہ بیان میں وزیراعظم نے کہا کہ ’عمران نیازی کا بیان پاک فوج کے خلاف اس کی گھٹیا ذہنیت کا ایک اور ثبوت ہے‘۔
وزیر اعظم کا کہنا ہے کہ یہ بیان 9 مئی کے المناک واقعات کے ماسٹر مائنڈ کا اعتراف جرم ہے اور یہ وہی ذہنیت ہے جس نے محب وطن آرمی افسران پر اپنے قتل کے جھوٹے الزامات لگائے اور سائفر اور بیرونی سازش کی جھوٹی کہانیاں گھڑیں۔
شہباز شریف نے کہا کہ یہ ملک دشمنی اور دہشت گردوں کے ماسٹر مائنڈ کے اصل عزائم کا اظہار ہے اور یہ اس بات کا بھی اعتراف بھی ہے کہ 9 مئی کو جو کچھ ہوا وہ عمران نیازی کے کہنے پر ہوا۔
انہوں نے مزید کہا کہ عمران خان کا وہ بیان ثبوت ہے کہ شہدا اور غازیوں کی یادگاروں کی بے حرمتی اور حساس تنصیبات اور عمارتوں پر حملے کے پیچھے منصوبہ بندی عمران خان کی ہی تھی۔
ان کا کہنا تھا کہ عمران خان کو جنرل سید عاصم منیر سے تکلیف یہ ہے کہ وہ بطور ڈی جی آئی ایس آئی عمران نیازی، ان کی اہلیہ، فرح گوگی اور پی ٹی آئی کی سینیئر قیادت کی بدترین کرپشن سے آگاہ ہیں۔
وزیر اعظم نے کہا کہ ’آرمی کے انتہائی ڈیکوریٹڈ، رینک اینڈ فائل میں ہردلعزیز اور میرٹ پر آرمی چیف بننے والے جنرل سید عاصم منیر کے خلاف ہرزہ سرائی بدنیتی کے سوا کچھ نہیں’۔ انہوں نے مزید کہا کہ شمشیر اعزاز اور حافظ قرآن ایماندار آرمی چیف سے عمران نیازی خوفزدہ ہیں۔
شہباز شریف کا کہنا تھا کہ دہشت گردی کے خلاف جنگ لڑنے والی بہادر فوج کے سپہ سالار کے خلاف اس نوعیت کی گھٹیا گفتگو دہشت گردوں کی حمایت ہے۔ وزیر اعظم نے یہ بھی واضح کیا کہ پوری قوم مسلح افواج اور آرمی چیف کے ساتھ کھڑی ہے۔
