محکمہ موسمیات نے پیش گوئی کی ہے کہ کراچی میں پیر کی صبح ہونے والی بارش کے بعد بدھ تک مزید شدید بارشوں کا سلسلہ جاری رہے گا۔
محکمہ موسمیات کے سینئر افسر انجم نذیر ضیغم کے مطابق سندھ کے کئی شہروں میں بھی بارشیں متوقع ہیں کیونکہ گہرے ڈپریشن کا مرکز اس وقت تھرپارکر میں موجود ہے۔
’آئندہ 24 گھنٹوں میں یہ سسٹم کمزور ہو کر ڈپریشن میں تبدیل ہو جائے گا اور صوبے کے شمال مغربی علاقوں کی طرف بڑھے گا۔‘
یہ بھی پڑھیں: کراچی سمیت سندھ بھرمیں بارشوں کا نیا سلسلہ کب متوقع؟ محکمہ موسمیات نے بتادیا
محکمہ موسمیات کے مطابق 10 ستمبر تک کراچی ڈویژن سمیت تھرپارکر، عمرکوٹ، میرپورخاص، سانگھڑ، شہید بینظیر آباد، ٹنڈو محمد خان، ٹنڈوالہ یار، حیدرآباد اور ٹھٹھہ میں گرج چمک کے ساتھ تیز ہوائیں اور وقفے وقفے سے شدید بارشوں کا امکان ہے۔
محکمہ موسمیات نے خبردار کیا ہے کہ اس دوران کراچی اور دیگر شہروں کے نشیبی علاقوں میں اربن فلڈنگ اور پانی جمع ہونے کے خدشات ہیں جبکہ دادو کے پہاڑی نالوں میں طغیانی بھی آسکتی ہے۔
محکمہ موسمیات کے فلڈ فورکاسٹنگ ڈویژن نے سندھ کے بڑے شہروں میں بدھ تک شدید شہری سیلاب کا الرٹ جاری کردیا ہے۔
مزید پڑھیں:کراچی: اوسط بارش 150 ملی میٹر لیکن برداشت کرنے کی گنجائش 40 ملی میٹر، آگے کیا ہوگا؟
محکمہ موسمیات کے مطابق حب ڈیم میں پانی کی سطح بڑھنے کا امکان ہے اور بارشوں سے سیلاب زدہ علاقوں کی صورتحال مزید سنگین ہوسکتی ہے۔
’تیز ہواؤں کے باعث کمزورعمارتوں، بجلی کے کھمبوں، بورڈز، گاڑیوں اور سولر پینلز کو نقصان پہنچ سکتا ہے۔ کسانوں کو ہدایت کی گئی ہے کہ وہ موسمی حالات کے مطابق اپنی سرگرمیوں کو منظم کریں۔‘
محکمہ موسمیات نے متعلقہ اداروں کو ہائی الرٹ رہنے اور ہنگامی اقدامات کرنے کی ہدایت دی ہے تاکہ کسی ناخوشگوار صورتحال سے بچا جا سکے۔
مزید پڑھیں:سندھ حکومت اور بلدیاتی اداروں کے دعوے بارش کے پانی میں بہہ گئے، فاروق ستار
دوسری جانب وزیر اعلیٰ سندھ مراد علی شاہ نے کہا ہے کہ دریائے سندھ میں سیلاب کی لہر اب 9 ستمبر کو گڈو بیراج پہنچے گی جس میں 8 لاکھ کیوسک سے زائد پانی ہوگا، ان کے مطابق متاثرہ کچے کے علاقوں سے لوگوں کے انخلا کی رفتار تیز کر دی گئی ہے۔
کراچی میں رین اینڈ ایمرجنسی مانیٹرنگ سیل میں میڈیا سے گفتگو کرتے ہوئے وزیر اعلیٰ نے بتایا کہ کمشنرز کچے کے علاقوں میں اعلانات کر رہے ہیں تاکہ لوگ اپنے گھروں کو خالی کرکے محفوظ مقامات پر منتقل ہو جائیں۔
انہوں نے کہا کہ صوبائی وزرا دریا کے دونوں کناروں پر موجود ہیں تاکہ انخلا کے عمل کی براہِ راست نگرانی کر سکیں۔
