بھارتی ریاست کرناٹک کے انتخابات میں کانگریس نے ہندو انتہاپسند حکمران جماعت بھارتیہ جنتا پارٹی( بی جے پی) کو عبرتناک شکست دے دی ہے۔
بھارتی الیکشن کمیشن کے اعداد و شمار کے مطابق اب تک کی ووٹوں کی گنتی کے مطابق انڈین نیشنل کانگریس کرناٹک میں 136 نشستیں جیت چکی ہے یا اسے برتری حاصل ہے۔ دوسری جانب وزیراعظم نریندر مودی کی انتہا پسند جماعت بی جے پی کو 68 سیٹیں جیت چکی ہے یا اسے سبقت حاصل ہے۔ جے ڈی ایس پارٹی نے20 نشستیں جیتی ہیں جبکہ 4 سیٹیں دیگر کے حصے میں آئی ہیں۔
گزشتہ ریاستی انتخابات کی نسبت انڈین نیشنل کانگریس کو 40 نشستیں زیادہ حاصل ہوئی ہیں جبکہ بھارتیہ جنتا پارٹی 27 نشستوں کے خسارے میں رہی ہے۔
کرناٹک کی ریاستی اسمبلی 224 ارکان پر مشتمل ہے ، بھارت کے قانون کے مطابق وزیراعلیٰ کے لیے کسی بھی جماعت کا 113 نشستیں جیتنا ضروری ہے۔130 نشستیں جیتنے کے بعد اب کرناٹک کا وزیراعلیٰ کانگریس کا ہوگا اور کانگریس بغیر کسی اتحادی جماعت کے ریاستی حکومت بنائے گی۔
کانگریس کے رہنما راہل گاندھی نے کرناٹک میں انتخابی فتح کے بعد بیان میں کہا کہ نفرت کا بازار بند ہوگیا اور محبت کی دکان کھل گئی ہے۔یہ کرناٹک کے عوام کی فتح ہے۔
