پاکستان کرکٹ بورڈ (پی سی بی ) نے پاکستان مینز کرکٹ ٹیم کے دورہ آسٹریلیا کا شیڈول جاری کر دیا ہے۔
پاکستان کرکٹ بورڈ ( پی سی بی ) نے شیڈول جاری کرتے ہوئے بتایا ہے کہ پاکستان کی قومی مینز کرکٹ ٹیم آسٹریلیا کی کرکٹ ٹیم کے خلاف 3 ٹیسٹ میچوں کی سیریز کھیلے گی۔
جاری شیڈول کےمطابق قومی کرکٹ ٹیم کا دورہ آسٹریلیا دسمبر2023 سے جنوری 2024 تک جاری رہے گا۔ اس دوران قومی کرکٹ ٹیم آسٹریلیا کے خلاف 3 ٹیسٹ میچوں کی سیریز کھیلے گی جسے ’بینو قادر ٹرافی‘ کے نام سے منسوب کیا گیا ہے۔
بیان کے مطابق اس سیریز کو تیسری ورلڈ ٹیسٹ چمپیئن شپ کا حصہ بھی قرار دیا جا رہا ہے۔ شیڈول کے مطابق یہ ٹیسٹ میچز پرتھ ، میلبرن اور سڈنی میں کھیلے جائیں گے۔
پہلا ٹیسٹ میچ پرتھ اسٹیڈیم میں 14 سے 18 دسمبر کو کھیلا جائے گا۔ دوسرا میلبرن کرکٹ اسٹیڈیم میں 26 سے 30 دسمبر جب کہ تیسرا اور آخری ٹیسٹ میچ سڈنی کرکٹ اسٹیڈیم میں 3 سے 7 جنوری کو کھیلا جائے گا۔
