پنجاب کی وزیر اطلاعات عظمیٰ بخاری نے اپنے سندھ کے ہم منصب شرجیل میمن کے بیان پر ردعمل دیتے ہوئے کہا ہے کہ انہیں ہر وقت بھاشن دینے کا شوق ہے۔ اگر سندھ میں واقعی بہتر انتظامات تھے تو سیلاب زدگان کی مکمل بحالی ابھی تک کیوں نہیں ہو سکی؟
یہ بھی پڑھیں: شرجیل میمن اور عظمیٰ بخاری آمنے سامنے آگئے
عظمیٰ بخاری نے کہا کہ بلاول بھٹو زرداری نے وزیراعلیٰ پنجاب مریم نواز کی تعریف کی ہے اور تسلیم کیا ہے کہ پنجاب میں سیلاب متاثرہ علاقوں میں بہترین منجمنٹ ہو رہی ہے۔ ان کے مطابق وہ اس سے بھی زیادہ معتبر چیئرمین سینیٹ یوسف رضا گیلانی کو سمجھتی ہیں، جو ملتان میں موجود رہ کر ریسکیو و ریلیف آپریشنز کی نگرانی کر رہے ہیں، نہ کہ کراچی بیٹھ کر بیانات دے رہے ہیں۔
بلاول بھٹو نے مریم نواز کی تعریف کی۔ میں یوسف رضا گیلانی کو زیادہ معتبر سمجھتی ہوں۔ شرجیل میمن کو بھاشن دینے کا شوق ہے، عظمیٰ بخاری@AzmaBokhariPMLN @sharjeelinam pic.twitter.com/E6FxCGKH12
— Azaad Urdu (@azaad_urdu) September 23, 2025
انہوں نے کہا کہ یوسف رضا گیلانی کی سیاست ملتان میں ہے اور وہ عملی طور پر ریلیف سرگرمیوں میں شامل ہیں، اس لیے بلاول اور گیلانی دونوں ہی پیپلز پارٹی کے معتبر رہنما ہیں اور ان ہی کی بات کو اہمیت دی جانی چاہیے۔
یہ بھی پڑھیں: سیلابی صورتحال سے نمٹنے کے لیے پیشگی اقدامات کرلیے، عظمیٰ بخاری
ان کا مزید کہنا تھا کہ محض الزامات لگانا آسان ہے، سندھ میں گزشتہ بار آنے والے سیلاب کے بعد بھی متاثرین کی مکمل بحالی ممکن نہیں ہو سکی۔ کراچی اور سندھ کی صورتحال سب کے سامنے ہے۔
پنجاب میں سیلاب کی تباہ کاریاں نہ تجربے کاری اور غفلت سے ہوئی – سندھ میں بہترین انتظامات کی وجہ سے نقصان نہیں ہوا سینئر صوبائی وزیر شرجیل انعام میمن کی میڈیا سے گفتگو – @sharjeelinam pic.twitter.com/nxQlE5GJBE
— Waqas Farooqui (@WaqasFarooqui5) September 22, 2025
عظمیٰ بخاری نے بتایا کہ سیلاب متاثرہ علاقوں کا ابتدائی سروے مکمل کر لیا گیا ہے، جس کے مطابق پنجاب کے 27 شہر متاثر ہوئے ہیں، 4 ہزار 794 مواضع جات اور 47 لاکھ 23 ہزار افراد سیلاب سے متاثر ہوئے۔
انہوں نے کہا کہ وزیراعلیٰ مریم نواز اور ان کی ٹیم متاثرہ علاقوں میں موجود رہ کر ریلیف سرگرمیوں کی نگرانی کر رہی ہے۔ وزیراعلیٰ نے ایک جامع ریلیف پیکیج کا اعلان کیا ہے، جس کے تحت مکمل تباہ شدہ گھروں کو 10 لاکھ روپے، جزوی متاثرہ گھروں کو 5 لاکھ روپے، متاثرہ کسانوں کو فی ایکڑ 20 ہزار روپے اور مال مویشی ضائع ہونے والے افراد کو فی جانور 5 لاکھ روپے دیے جائیں گے۔
پنجاب میں پاکستان کی تاریخ کا سب سے بڑا سیلاب آیا، عظمیٰ بخاری#AzmaBukhari #PunjabFloods #PakistanFloods #NaturalDisaster #FloodCrisis #EmergencyUpdate #PakistanNews #HistoricFlood #DisasterRelief #ClimateCrisis pic.twitter.com/3EVeG5YBtL
— APP (@appcsocialmedia) September 23, 2025
وزیر اطلاعات پنجاب نے واضح کیا کہ یہ ریلیف پیکیج پنجاب حکومت اپنے وسائل سے فراہم کر رہی ہے اور کسی بیرونی امداد کا انتظار نہیں کیا جا رہا۔ ان کا کہنا تھا کہ ہمیں یقین ہے کہ ہم اپنے ہی وسائل سے اس بحران پر قابو پا لیں گے۔
خیال رہے کہ اس سے قبل شرجیل میمن نے بیان میں کہا تھا کہ پنجاب میں سیلاب سے ہونے والی تباہ کاریاں غفلت اور ناتجربہ کاری کے باعث ہوئیں، جبکہ سندھ میں بہترین انتظامات کی وجہ سے نقصانات کم ہوئے۔ ان کے مطابق اگر پنجاب میں بہتر منصوبہ بندی کی جاتی تو اتنی بڑی تباہی سے بچا جا سکتا تھا۔
