اقوام متحدہ کی 80ویں جنرل اسمبلی کے موقع پر نیویارک میں منعقدہ اسلامی تعاون تنظیم یعنی او آئی سی کے رابطہ گروپ برائے جموں و کشمیر کے اجلاس کی صدارت او آئی سی کے سیکریٹری جنرل نے کی جبکہ پاکستان، آذربائیجان، ترکیہ، سعودی عرب اور نائجر کے وزرائے خارجہ اور اعلیٰ حکام شریک ہوئے۔
اجلاس میں او آئی سی سیکریٹریٹ، انسانی حقوق کمیشن اور کشمیری عوام کے حقیقی نمائندوں کی بریفنگ کے بعد، گروپ کے وزرائے خارجہ نے کشمیری عوام کے ناقابل تنسیخ حقِ خودارادیت کی بھرپور تائید کرتے ہوئے اسے اقوام متحدہ کی قراردادوں کے مطابق حل کرنے پر زور دیا۔
یہ بھی پڑھیں: عالمی سطح پر مسئلہ کشمیر کی گونج، او آئی سی کا پاکستان سے اظہارِ یکجہتی، بھارتی پالیسیوں کی مذمت
شرکا نے پاکستان اور آزاد جموں و کشمیر میں حالیہ بھارتی حملوں پر گہری تشویش کا اظہار کرتے ہوئے کہا کہ یہ اقدامات خطے کے امن کے لیے خطرہ ہیں۔ تاہم اجلاس نے دونوں ممالک کے درمیان حالیہ سیزفائر کا خیر مقدم کیا اور ثالثی کے لیے کوشش کرنے والے ممالک کا شکریہ ادا کیا۔
Meeting of the OIC Contact Group on Jammu & Kashmir on the Sidelines of 80th Session of the United Nations General Assembly held on 23 September 2025 in New York Joint Communique'https://t.co/j1t9LOB7jd pic.twitter.com/CJNGs2pdmA
— Ministry of Foreign Affairs – Pakistan (@ForeignOfficePk) September 24, 2025
اجلاس میں اس بات پر بھی زور دیا گیا کہ 22 اپریل کو پہلگام حملے کے بعد بھارت کی جانب سے مقبوضہ کشمیر میں کریک ڈاؤن، 2,800 افراد کی گرفتاری، درجنوں گھروں کی مسماری اور مذہبی اجتماعات پر پابندیاں، انسانی حقوق کی سنگین خلاف ورزیاں ہیں۔
وزرائے خارجہ نے کشمیری رہنما شبیر احمد شاہ کی بیماری کے باوجود مسلسل حراست پر گہری تشویش ظاہر کی اور ہزاروں سیاسی کارکنوں و انسانی حقوق کے علمبرداروں کی قید، جماعتوں پر پابندی اور جائیدادوں کی ضبطی کی مذمت کی۔
اعلامیے میں واضح کیا گیا کہ بھارت کے 5 اگست 2019 کے غیرقانونی اور یکطرفہ اقدامات ناقابلِ قبول ہیں اور ان کے ذریعے مقبوضہ علاقے کی حیثیت اور آبادیاتی ڈھانچے کو تبدیل نہیں کیا جا سکتا۔
مزید پڑھیں:’اسرائیل خطے میں عدم استحکام کا سبب بن رہا ہے‘، صدر او آئی سی اجلاس خاقان فیدان
اجلاس نے اس بات پر زور دیا کہ بھارتی آئین کے تحت مقبوضہ کشمیر میں کرائے جانے والے انتخابات کشمیری عوام کے حقِ خودارادیت کا متبادل نہیں ہو سکتے۔
او آئی سی رابطہ گروپ نے اقوام متحدہ اور عالمی برادری پر زور دیا کہ وہ کشمیری عوام کی جدوجہد کو اجاگر کرتے ہوئے بھارت پر زور دیں کہ وہ تمام سیاسی قیدیوں کو رہا کرے، انسانی حقوق کی خلاف ورزیاں بند کرے اور سلامتی کونسل کی قراردادوں پر عمل درآمد کرے۔
