عالمی ٹیکنالوجی کمپنی گوگل نے پاکستان میں اپنا نیا ’اے آئی پلس پلان‘ متعارف کرا دیا ہے، جس کے تحت صارفین کو جدید ترین مصنوعی ذہانت کے ٹولز تک نسبتاً کم قیمت پر وسیع رسائی حاصل ہو گی۔
یہ بھی پڑھیں: گوگل نے جیمنی 2.5 فلیش امیج اے آئی متعارف کرا دیا، خصوصیات کیا ہیں؟
گوگل کے مطابق یہ پلان پیداواریت اور تخلیقی صلاحیت بڑھانے کے لیے ڈیزائن کیا گیا ہے، جس میں جیمینائی ایپ پر امیج جنریشن اور ایڈیٹنگ کی زیادہ سہولتیں، گوگل کے طاقتور ترین اے آئی ماڈل ’جیمینائی 2.5 پرو‘ تک بہتر رسائی اور جی میل، ڈاکس اور شیٹس کے ساتھ جیمینائی کا انضمام شامل ہے۔
اس کے علاوہ صارفین کو ’ویو 3 فاسٹ‘ ویڈیو جنریشن ماڈل، ’وسک‘ اور ’فلو‘ تک رسائی بھی حاصل ہو گی، جبکہ گوگل فوٹوز، ڈرائیو اور جی میل کے لیے 200 جی بی اسٹوریج دی جائے گی۔ کمپنی نے بتایا کہ اس سبسکرپشن کے تحت ایک اکاؤنٹ کو 5 فیملی ممبرز کے ساتھ شیئر بھی کیا جا سکے گا۔
یہ بھی پڑھیں: سرچ کے میدان میں نئی پیش رفت، گوگل نے پاکستان میں ’اے آئی‘ موڈ متعارف کرا دیا
گوگل پاکستان کے کنٹری ڈائریکٹر فرحان قریشی نے کہا کہ ’پاکستان کا ڈیجیٹل منظرنامہ تیزی سے ترقی کررہا ہے اور پاکستانیوں نے اے آئی ٹولز کو اپنانے میں شاندار تخلیقی صلاحیت دکھائی ہے، اب اے آئی پلس کے ذریعے ہم یہ سہولت زیادہ سے زیادہ افراد تک پہنچا رہے ہیں۔‘
یہ پلان آج سے پاکستان میں دستیاب ہے، جس کی ماہانہ فیس ایک ہزار 400 روپے رکھی گئی ہے۔ نئے صارفین کو ابتدائی 6 ماہ کے لیے 50 فیصد رعایت بھی دی جائے گی۔
