عمران خان جھنجھلاہٹ کا شکار اور پی ٹی آئی گروہوں میں تقسیم ہو چکی ہے، مجیب الرحمان شامی

سینیئنر صحافی وتجزیہ نگار مجیب الرحمان شامی کا کہنا ہے کہ پاکستان تحریک انصاف (پی ٹی آئی) کے بانی چیئرمین عمران خان جھلاہٹ کا شکار ہیں اور ان کی پارٹی گروہوں میں تقسیم ہو چکی ہے۔

یہ بھی پڑھیں: بانی پی ٹی آئی عمران خان کا ایکس اکاؤنٹ خطرے میں، حکومت نے بڑا فیصلہ کرلیا

وی نیوز کے پروگرام سیاست اور صحافت میں سینیئر صحافی خرم شہزاد سے گفتگو کرتے ہوئے مجیب الرحمان شامی نے کہا کہ عمران پی ٹی آئی کے لوگوں پر اعتماد نہیں کرتے جبکہ ان کو پارٹی کے نظم کا خاص خیال رکھنا ہوگا۔

مجیب الرحمان شامی نے کہا کہ پاکستانی سیاست میں کوئی بھی اندازہ لگانا مشکل ہوتا ہے اور یہاں کسی بھی وقت کچھ بھی ہو سکتا ہے۔

انہوں نے کہا کہ عمران خان کا تجربہ بہت وسیع ہے اور انہوں نے دنیا میں نام کمایا ہے مگر انہیں سڑکوں کی سیاست سے نکلنا ہوگا اور اپنی پارٹی کو اختیارات دینے ہوں گے۔

’18ویں ترمیم کے بعد حقوق کا بیانیہ فضول ہے‘

مجیب الرحمان شامی نے کہا کہ ریاست دہشتگردوں سے سختی سے نمٹ رہی ہے اور روز بروز اس میں کامیابی بھی مل رہی ہے۔

انہوں نے مزید کہا 18ویں آئینی ترمیم کے بعد حقوق کا بیانیہ پیش کرنا فضول بات ہے کیوں کہ ہر صوبے کو اس کا حق مل رہا ہے۔

’سعودی عرب کا معاشی نظام پاکستان نے کھڑا کیا‘

سعودی عرب کے ساتھ پاکستان کے تعلقات عشروں پر محیط ہیں اور یہ تعلق شروع سے لے کر آج تک خوشگوار اور برادرانہ رہے ہیں۔

انہوں نے کہا کہ سعودی عرب کی اکانومی اور بینکنگ سسٹم کو کھڑا کرنے میں پاکستان کا بہت اہم کردار ہے اور پاکستان کے انور علی مرحوم کا نام تو سعودی ریال پر چھپا کرتا تھا۔

مزید پڑھیے: جی ایچ کیو حملہ کیس: عمران خان واٹس ایپ پر پیش ہوئے، وکلا نے بائیکاٹ کیوں کیا؟

مجیب الرحمان شامی نے کہا کہ سعودی عرب میں تیل دریافت ہونے سے پہلے پاکستان نے ان کی بہت مدد کی اور بعد میں بھی پاکستان نے سعودیہ عرب کے دفاع میں بھی اہم کرادر ادا کیا۔

انہوں نے کہا کہ اب پاکستان اور سعودیہ عرب نے مل کر یہ معاہدہ کیا ہے کہ ایک ملک پر جنگ دونوں ممالک پر جنگ قرار دی جائے گی،  یہ معاہدہ اپنی نوعیت کا پہلا معاہدہ ہے اور اس کی مثال دنیا میں نہیں ملتی۔

سینیئر تجزیہ کار نے کہا کہ اس دفاعی معاہدے کے بعد دونوں ممالک مزید مضبوط ہو گئے ہیں جبکہ اس سے دونوں کی ترقی میں بھی تیزی آئے گی۔

’معرکہ حق کے بعد پاکستان کا دنیا میں وقار بڑھا‘

مجیب الرحمان شامی نے کہا کہ معرکہ حق کے بعد پاکستان کی پوزیشن دنیا پر واضح ہوئی ہے اسی لیے دوست ممالک کا پاکستان پر اعتماد بڑھا ہے جس کی وجہ سے دنیا میں پاکستان کو عزت اور مضبوط ملک کے طور پر دیکھا جا رہا ہے۔

مزید پڑھیں: پشاور میں ریلیز عمران خان جلسے کی تیاریاں، زمینی حقائق کیا ہیں اور کامیابی کے امکانات کتنے ہیں؟

انہوں نے کہا پاکستان کی خارجہ پالیسی شاندار ہے اور پاکستان نے ایران، چین، روس، امریکا، سعودی عرب اور دیگر ممالک کے ساتھ اچھے اور برابری کے تعلقات استوار کیے۔

’یہ پارٹنرشپ لمبی چلے گی‘

مجیب الرحمان شامی نے موجودہ حکومت اور اسٹیبلشمنٹ کو اچھی کمبینیشن قرار دیتے ہوئے کہا کہ وزیر اعظم پاکستان اور فیلڈ مارشل کی پارٹنرشپ آگے چلے گی۔

’قومی اسمبلی اپنی مدت پوری کرے گی‘

انہوں نے حکومتی اتحاد کے حوالے سے کہا کہ چھوٹے موٹے مسائل آتے رہیں گے مگر ن لیگ اور پیپلز پارٹی کے پاس اتحاد کے علاوہ کوئی آپشن نہیں ہے جبکہ ہر کسی کو اپنا اپنا حصہ مل چکا ہے۔

یہ بھی پڑھیے: عمران خان کو ریلیف؟ اہم فیصلہ ہوگیا، ڈی جی آئی ایس پی آر کی ملک دشمنوں کو آخری وارننگ

مجیب الرحمان شامی نے کہا کہ آگلے الیکش تک شہباز شریف ہی وزیر اعظم رہیں گے جبکہ یہ اسمبلی اپنی مدت پوری کرے گی۔

انہوں نے کہا کہ پاکستان کے مستقبل کے لیے شہباز شریف کا ہونا ضروری ہے۔