بانی پی ٹی آئی عمران خان کے قریبی ساتھی اور آزاد جموں و کشمیر قانون ساز اسمبلی کے اوورسیز ممبر محمد اقبال نے اپنے عہدے سے استعفیٰ دے دیا ہے۔
محمد اقبال نے اپنے بیان میں کہا کہ انہوں نے ذاتی فیصلے کے تحت اسمبلی رکنیت سے مستعفی ہونے کا فیصلہ کیا ہے کیونکہ ان کے نزدیک اسمبلی عوامی اعتماد کھو چکی ہے۔
یہ بھی پڑھیں: آزاد کشمیر میں عوامی ایکشن کمیٹی کے مظاہرے میں پولیس اہلکاروں پر تشدد، اہلکار زخمی
سماجی رابطے کے پلیٹ فارم فیس بک پراسپیکر آزاد کشمیر قانون ساز اسمبلی کو بھیجے گئے اپنے استعفے کے ساتھ اپنی ایک پوسٹ میں انہوں نے لکھا کہ یہ نشست انہیں ان کے قائد عمران خان نے دی تھی جو ان کے لیے اعزاز تھا۔
’۔۔۔مگر اب میں نہیں سمجھتا کہ ایسی اسمبلی کا حصہ رہنے کا کوئی جواز ہے جو جماعت یا عوام کے مفاد میں کام نہ کرے۔‘
انہوں نے مزید کہا کہ قیادت کی خواہش تھی کہ وہ اپنی ذمہ داری جاری رکھیں، تاہم انہوں نے ذاتی طور پر مستعفی ہونے کا فیصلہ کیا۔
محمد اقبال کا کہنا تھا کہ وہ اپنی نجی حیثیت میں آزاد کشمیر کے عوام کی خدمت جاری رکھیں گے اور خاص طور پر ان خاندانوں کی معاونت کریں گے جنہوں نے حالیہ واقعات میں اپنے پیارے کھوئے ہیں۔
محمد اقبال نے دعا کی کہ جلد از جلد مذاکرات کا آغاز ہو تاکہ خطے میں جاری سیاسی بحران کا خاتمہ ہوسکے۔
مزید پڑھیں:عوامی مفاد یا بھارتی ایجنڈے کو تقویت؟ ایکشن کمیٹی بے نقاب ہوگئی
واضح رہے کہ محمد اقبال 2021 کے عام انتخابات میں مخصوص نشست پر اسمبلی کے رکن منتخب ہوئے تھے، تاہم آزاد کشمیر میں پی ٹی آئی کی حکومت کے خاتمے اور 2 وزرائے اعظم کی تبدیلی کے بعد وہ عملاً سیاست سے کنارہ کش ہو چکے تھے۔
