امریکی سرکاری شٹ ڈاؤن کے اثرات فضائی نظام تک جا پہنچے ہیں، جہاں کیلیفورنیا کے ہالی ووڈ بر بینک ایئرپورٹ پر پیر کی شام کئی گھنٹوں تک ایئر ٹریفک کنٹرول عملہ دستیاب نہیں رہا۔
فیڈرل ایوی ایشن ایڈمنسٹریشن (FAA) کے مطابق یہ کمی شام 4 بج کر 15 منٹ سے رات 10 بجے تک برقرار رہی، جس کے دوران پروازوں کی رہنمائی عارضی طور پر سان ڈیاگو میں قائم سدرن کیلیفورنیا TRACON ٹیم نے سنبھالی۔
مزید پڑھیں: پاکستان کی امریکا کو پسنی پورٹ ٹرمینل میں سرمایہ کاری کی پیشکش
عملے کی کمی کے باعث ڈینور، ڈیٹرائٹ، انڈیاناپولس اور فینکس کے ہوائی اڈوں پر بھی گراؤنڈ ڈیلے رپورٹ کیے گئے ہیں۔
حکام کے مطابق ہزاروں ایئر ٹریفک کنٹرولرز اور سیکیورٹی اہلکار تنخواہوں کے بغیر فرائض انجام دے رہے ہیں، جبکہ ملک میں ایئر ٹریفک کنٹرولرز کی پہلے ہی 3 ہزار کی کمی ہے۔
مزید پڑھیں: امریکا کا کیریبین سمندر میں چوتھا فضائی حملہ، 4 مبینہ منشیات فروش ہلاک
کیلیفورنیا کے گورنر گیون نیوزم نے صورتحال کا ذمہ دار صدر ڈونلڈ ٹرمپ کو قرار دیا، ان کا کہنا تھا کہ ’بر بینک ایئرپورٹ پر عملے کی عدم دستیابی شٹ ڈاؤن کی براہِ راست وجہ ہے۔‘
امریکا میں حکومت کے شٹ ڈاؤن کو 6 دن گزر چکے ہیں اور سینیٹ میں ڈیموکریٹس اور ریپبلکنز کی جانب سے پیش کردہ فنڈنگ بل ایک بار پھر مسترد ہونے کے بعد وفاقی اداروں کی بحالی تاحال غیر یقینی ہے۔
