کراچی چیمبرآف کامرس اینڈ انڈسٹری نے سیاسی بحران ختم کرنے کے لیے اپنا کردار ادا کرنے کی خاطر میدان میں اترنے کا عندیہ دے دیا۔
کراچی چیمبر آف کامرس کے مطابق ملک میں سیاسی عدم استحکام نے پاکستان کی معاشی بقا داؤ پر لگا دی ہے، ملک کی خاطر سیاسی جماعتیں، عدلیہ اور اسٹیبلشمنٹ سر جوڑ کر بیٹھیں۔ سیاسی کشمکش میں الجھنا صرف تباہی لائے گا۔
صدر کراچی چیمبر آف کامرس طارق یوسف نے وی نیوز سے بات چیت کرتے ہوئے کہا کہ سیاسی محاذ پر کشیدہ صورتحال ملکی معیشت پر منفی اثرات مرتب کررہی ہے، بحثیت کراچی چیمبر آف کامرس ہم سمجھتے ہیں کہ یہ تناؤ ختم ہونا چاہیے۔
اسٹیک ہولڈرز معیشت کی بہتری کے لیے ہم آہنگی پیدا کریں: طارق یوسف
انہوں نے کہا کہ ہم ملک کی بگڑتی معاشی صورتحال کو سنبھالنے کے لیے اپنا کردار ادا کرنا چاہتے ہیں۔ یہ کسی ایک فرد کا معاملہ نہیں بلکہ تمام ادارے اور اسٹیک ہولڈرز ملکی معیشت کی بہتری کی خاطر ہم آہنگی پیدا کریں۔
طارق یوسف کا کہنا تھا کہ بجٹ کے حوالے سے پورا سال ہم تجاویز دیتے ہیں لیکن اس وقت ہمارے سامنے ملک کی بگڑتی معاشی صورتحال ہے، بیرونی سرمایہ کاری کم ہوتی جارہی ہے۔ ہماری توجہ اس وقت بیرونی سرمایہ کاری اور مینوفیکچرنگ سرگرمیوں کی طرف ہے۔ ہماری جانب سے تمام اسٹیک ہولڈرز کے لیے ایک تجویز ہے اگر اس کا مثبت جواب آجاتاہے تو ہم اپنا کردار ضرور ادا کریں گے۔
کراچی چیمبر آف کامرس کے مطابق جاری سیاسی اور معاشی بحرانوں کا سدباب نہ کیا گیا تو مسائل اور بڑھ جائیں گے، آئی ایم ایف کے بغیر بھی پاکستان کی معاشی بقا کے راستے اور ذرائع موجود ہیں۔