یورپ کا سفر کرنے والے مسافروں کے لیے ایک بڑی تبدیلی متعارف کرائی جا رہی ہے، 12 اکتوبر 2025 سے شینگن معاہدے میں شامل 29 یورپی ممالک میں داخلے اور اخراج کے لیے نیا ڈیجیٹل انٹری اور ایگزٹ سسٹم نافذ ہو جائے گا۔
اس نظام کے تحت روایتی پاسپورٹ پر اسٹیمپ لگانے کا طریقہ ختم کر کے بایومیٹرک تصدیق یعنی چہرے اور انگلیوں کے نشانات متعارف کرائی جا رہی ہے۔
یہ بھی پڑھیں: شینگن ویزا مسترد ہونے میں پاکستانی کس نمبر پر ہیں؟
یہ نیا نظام تمام غیر یورپی شہریوں پر لاگو ہوگا جو 90 دن یا اس سے کم مدت کے لیے یورپ کا دورہ کرتے ہیں، البتہ یورپی یونین کے شہریوں، رہائشیوں اور طویل مدتی ویزا یا رہائشی اجازت نامہ رکھنے والوں کو اس سے استثنیٰ حاصل ہوگا۔
یہ تبدیلی کیوں؟
یورپی حکام کے مطابق اس نظام کا مقصد امیگریشن کے عمل کو تیز، محفوظ اور شفاف بنانا ہے۔
اب مسافروں کو داخلے یا روانگی کے وقت صرف پاسپورٹ اسکین کرانا ہوگا، جس کے ساتھ چہرے اور فنگر پرنٹس کا بایومیٹرک ڈیٹا بھی لیا جائے گا۔
مزید پڑھیں: گریس کا ڈیجیٹل نومیڈ ویزا: پاکستانیوں کے لیے کیا خاص ہے؟
یہ ڈیٹا خودکار طور پر محفوظ ہو گا، جس میں داخلے اور اخراج کی تاریخ، مقام اور قیام کا دورانیہ درج ہوگا۔ اس سے غیر قانونی قیام کی نگرانی اور شناختی دھوکا دہی کی روک تھام میں مدد ملے گی۔
یہ نظام کام کیسے کرے گا؟
غیر یورپی شہری جب شینگن زون میں داخل ہوں گے یا وہاں سے نکلیں گے تو انہیں بارڈر کِیوسک یا آٹومیٹک گیٹس پر پاسپورٹ اسکین کے ساتھ فنگر پرنٹس اور چہرے کی شناخت کروانی ہوگی۔
اس ڈیجیٹل ریکارڈ سے معلوم ہو سکے گا کہ کوئی مسافر 90 دن سے زائد قیام تو نہیں کر رہا۔
کیا ہر مسافر کے لیے بایومیٹرک پاسپورٹ لازمی ہے؟
مزید پڑھیں: بحرین کا گولڈن ویزا کن پاکستانیوں کے لیے فائدہ مند ہو سکتا ہے؟
اگرچہ یہ لازمی نہیں مگر بایومیٹرک پاسپورٹ رکھنے والوں کے لیے عمل تیز اور آسان ہوگا۔
جن کے پاس پرانے یعنی نان بایومیٹرک پاسپورٹ ہوں گے، ان کی پروسیسنگ میں کچھ زیادہ وقت لگ سکتا ہے۔
کب مکمل طور پر نافذ ہوگا؟
یہ نظام 12 اکتوبر 2025 سے مرحلہ وار نافذ کیا جا رہا ہے، جب کہ مکمل نفاذ 10 اپریل 2026 تک متوقع ہے۔
اس دوران بعض مقامات پر پاسپورٹ اسٹیمپنگ عارضی طور پر جاری رہ سکتی ہے۔
کیا پاسپورٹ پر اسٹیمپنگ ختم ہو جائے گا؟
جی ہاں، روایتی اسٹیمپنگ کا عمل مکمل طور پر ختم کر دیا جائے گا۔
اس کی جگہ ڈیجیٹل ریکارڈ رکھا جائے گا جو بایومیٹرک ڈیٹا کے ساتھ منسلک ہوگا۔
مسافروں کے لیے ہدایات
اپنے پاسپورٹ کی میعاد اور بایومیٹرک فیچر چیک کریں، ایئرپورٹ یا بارڈر پر معمول سے پہلے پہنچیں تاکہ نئے سسٹم کی وجہ سے کسی تاخیر کا سامنا نہ ہو، ایئرلائنز اور حکومتی سفری ہدایات سے باخبر رہیں۔
یہ نظام کہاں لاگو ہوگا؟
انٹری اور ایگزٹ سسٹم تمام شینگن ممالک کے ائیرپورٹس، بندرگاہوں اور زمینی بارڈرز پر نافذ کیا جائے گا، تاکہ 2026 تک پورا یورپی علاقہ ایک متحدہ ڈیجیٹل بارڈر سسٹم کے تحت کام کر سکے۔
