امریکی سینٹرل کمانڈ (سینٹ کام) کے سربراہ ایڈمرل بریڈ کوپر نے کہا ہے کہ انہوں نے غزہ کا دورہ کیا ہے تاکہ جنگ کے بعد استحکام کے اقدامات پر بات کی جا سکے، تاہم انہوں نے واضح کیاکہ امریکی فوجی غزہ میں تعینات نہیں کیے جائیں گے۔
ایڈمرل بریڈ کوپر نے سوشل میڈیا پلیٹ فارم ’ایکس‘ پر اپنے بیان میں کہا کہ وہ حال ہی میں غزہ کے دورے سے واپس آئے ہیں، جہاں انہوں نے سینٹ کام کی زیر قیادت ایک ’سول ملٹری کوآرڈینیشن سینٹر‘ کے قیام پر تبادلہ خیال کیا۔
Statement from Adm. Brad Cooper, CENTCOM commander: pic.twitter.com/1TeByRzPoF
— U.S. Central Command (@CENTCOM) October 11, 2025
ان کا کہنا تھا کہ یہ مرکز غزہ میں جنگ کے بعد امن و استحکام کے لیے مدد فراہم کرے گا۔
انہوں نے مزید بتایا کہ صدر ڈونلڈ ٹرمپ کے امن منصوبے کے تحت حماس اور اسرائیل کے درمیان جنگ بندی کی نگرانی کے لیے 200 امریکی اہلکاروں کا ابتدائی دستہ اسرائیل پہنچنا شروع ہوگیا ہے۔
ایڈمرل کوپر کے مطابق امریکی فوج ایک کثیرالملکی ٹاسک فورس کی قیادت کرے گی جو غزہ میں تعینات ہوگی اور اس میں مصر، قطر، ترکیہ اور متحدہ عرب امارات کے فوجی بھی شامل ہوں گے۔
اپنے بیان میں انہوں نے کہاکہ امریکا کے بیٹے اور بیٹیاں مشرقِ وسطیٰ میں امن کے قیام کے لیے کمانڈر ان چیف کی ہدایات کے مطابق تاریخ ساز لمحے میں اپنی خدمات پیش کر رہے ہیں۔
واضح رہے کہ ایڈمرل بریڈ کوپر کو رواں سال اگست کے اوائل میں سینٹرل کمانڈ (سینٹ کام) کا سربراہ مقرر کیا گیا تھا، جو مشرقِ وسطیٰ میں امریکی افواج کی کارروائیوں کی نگرانی کرتی ہے۔
