میٹا کمپنی نے فیس بک اور انسٹاگرام پر ریلز سے آمدنی کے نئے اور آسان منصوبے کا اعلان کردیا، فیچر کو مزید بہتر بناکر اب ویڈیوز پر اشتہارات دکھانے کی مد میں کانٹینٹ کریئیٹرز کو پیسے دیے جائیں گے، مارک زکربرگ نے ابتدائی طور پر جون 2022ء میں فیس بک اور انسٹاگرام پر مختصر ویڈیوز سے پیسے کمانے کے منصوبے کو پیش کرنے کا اعلان کیا تھا۔
میٹا کی جانب سے اپنی بلاگ پوسٹ میں بتایا گیا کہ مختصر ویڈیوز یعنی ریلز کے ذریعے آمدنی کے فیچر کو مزید بہتر بناکر اب ویڈیوز پر اشتہارات دکھانے کی مد میں کانٹینٹ کریئیٹرز کو پیسے دیے جائیں گے۔
بلاگ میں بتایا گیا کہ کمپنی صارفین کی ریلز کی کارکردگی کی بنیاد پر ان کی ویڈیوز پر اشتہارات چلائے گی اور ویوز کی بنیاد پر ہی کریئیٹرز کو پیسے فراہم کیے جائیں گے۔ کمپنی نے مواد کے تخلیق کاروں کو مشورہ دیا ہے کہ وہ اپنی تخلیقی صلاحیتوں کی بنیاد پر اپنی ویڈیوزکو بہتر بنائیں تاکہ انہیں زیادہ سے زیادہ اشتہارات دیے جا سکیں۔
مذکورہ پروگرام کے تحت نہ صرف فیس بک بلکہ انسٹاگرام ریلز پر بھی مواد کے تخلیق کاروں کو اشتہارات کی مد میں پیسے فراہم کیے جائیں گے۔
میٹا کے مطابق مذکورہ پروگرام کے تحت جلد ہی پہلے انسٹاگرام پر آزمائشی پروگرام شروع کیا جائے گا، جس کے بعد فیس بک کو بھی آزمائش کا حصہ بنا کر کچھ وقت کے بعد پروگرام کو باضابطہ طور پر متعارف کرایا جائے گا۔ کمپنی کے مطابق پہلے مرحلے میں مذکورہ پروگرام دنیا بھر کے 52 ممالک میں پیش کیا جائے گا، جس میں متعدد ایشیائی ممالک بھی شامل ہیں۔ حیران کن طور پر پہلے مرحلے میں پاکستان شامل نہیں ہے جب کہ اس پروگرام کے پہلے ہی مرحلے میں بھارت کو شامل کرلیا گیا ہے۔
اس فیچر کے تحت 18 سال سے زائد عمر کا ہر صارف ویڈیوز کے ذریعے پیسے کما سکے گا، تاہم صارفین کو اپنے اکاؤنٹس کو پروفیشنل موڈ میں تبدیل کرنا ہوگا اور یہ فیچر فیس بک نے گزشتہ سال ہی پیش کر دیا تھا۔
