وفاقی وزیر برائے توانائی اویس لغاری نے کہا ہے کہ حکومت نے صنعت اور زراعت کے لیے بجلی کی قیمت میں نمایاں کمی کا فیصلہ کیا ہے، جس سے پیداواری لاگت کم اور معیشت کو سہارا ملے گا۔
اسلام آباد میں پریس کانفرنس کرتے ہوئے اویس لغاری نے بتایا کہ ماضی میں زراعت کے لیے بجلی 38 روپے فی یونٹ میں فراہم کی جاتی تھی، اب اس کی قیمت کم ہو کر 22.98 روپے فی یونٹ رہ گئی ہے۔ اسی طرح صنعتی شعبے میں بجلی کی قیمت 35 روپے سے کم کر کے 22.98 روپے فی یونٹ کر دی گئی ہے۔
یہ بھی پڑھیں: نیپرا نے بجلی سستی کردی، صارفین کو 24 ارب روپے سے زیادہ کا ریلیف
انہوں نے کہا کہ اگر کوئی کسان یا صنعت کار اپنی موجودہ کھپت میں اضافہ کرے تو اضافی یونٹس پر مزید رعایت دی جائے گی۔ مثال کے طور پر، اگر کوئی کسان 100 یونٹس کے بجائے 200 یونٹس استعمال کرے تو بجلی کی اوسط لاگت 7 روپے فی یونٹ کم ہو جائے گی۔ اسی طرح، صنعتی صارف اگر ایک اضافی شفٹ لگا کر مزید 1000 یونٹس استعمال کرے تو فی یونٹ لاگت 5 روپے کم ہو گی۔
وفاقی وزیر نے کہا کہ گزشتہ 18 ماہ میں حکومت نے صنعت کے لیے فی یونٹ بجلی 16 روپے اور عام صارفین کے لیے 10 روپے تک سستی کی ہے۔ ان کا کہنا تھا کہ اس اقدام سے نہ صرف برآمدات میں اضافہ ہوگا بلکہ روزگار کے مواقع بھی بڑھیں گے۔
یہ بھی پڑھیں: پاور سیکٹر کے نقصان میں 192 ارب روپے کمی، ٹیکس دہندگان کے 151 ارب روپے بچائے: اویس لغاری
اویس لغاری نے کہا کہ پاکستان کے نظام میں 7000 میگاواٹ سے زائد اضافی بجلی موجود تھی جو استعمال نہ ہونے کے باعث ضائع ہو رہی تھی، اب یہ بجلی سستی کر کے صنعت اور زراعت کو دی جائے گی تاکہ ملک کی معیشت کو فائدہ پہنچے۔
انہوں نے کہا کہ وزیرِاعظم کی ہدایت پر روشن معاشی بجلی پیکیج کے تحت یہ فیصلہ کیا گیا ہے، جو عوام کے لیے خوشخبری ہے
