تحریکِ انصاف کے سیکریٹری جنرل سلمان اکرم راجہ نے کہا ہے کہ پیپلز پارٹی اور مسلم لیگ ن کے پاس آزاد جموں و کشمیر اسمبلی میں حقیقی اپوزیشن بنانے کا کوئی منصوبہ نہیں، دونوں جماعتیں ایک ہی سکے کے دو رخ ہیں۔
ان کا بیان اُس وقت سامنے آیا ہے جب آزاد کشمیر میں سیاسی ہلچل پیدا ہوگئی ہے، جولائی 2021 کے عام انتخابات میں پی ٹی آئی کے ٹکٹ پر کامیاب پی ٹی آئی کے 10 ارکانِ اسمبلی نے گزشتہ روز اعلان کیا کہ وہ پیپلز پارٹی میں شامل ہو رہے ہیں۔
یہ بھی پڑھیں: وزیراعظم آزاد کشمیر کو عدم اعتماد کا سامنا، کیا آج مستعفی ہو جائیں گے؟
پیپلز پارٹی وزیراعظم کے عہدے کے لیے کوشاں ہے جبکہ پیپلز پارٹی اور ن لیگ نے حکومت کے خلاف عدم اعتماد کی تحریک لانے پر اتفاق کیا ہے۔
جیو نیوز کے پروگرام کیپیٹل ٹاک میں گفتگو کرتے ہوئے سلمان اکرم راجہ نے کہا کہ پیپلز پارٹی اور ن لیگ ایک ہی سکے کے دو رخ ہیں۔
’دونوں میں گٹھ جوڑ ہے اور ان کی نیت اصل اپوزیشن بننے کی نہیں، یہ صرف باری باری اقتدار میں رہنا چاہتے ہیں۔‘
جمعیت علمائے اسلام (ف) قومی اسمبلی میں نئی اپوزیشن کی تشکیل میں پی ٹی آئی، پیپلز پارٹی یا ن لیگ میں سے کسی کی حمایت کرے گی؟ اس سوال کو جواب دیتے ہوئے سلمان اکرم راجہ کا مؤقف تھا کہ ماضی کو دیکھتے ہوئے انہیں نہیں لگتا کہ وہ آخر میں پی ٹی آئی کے ساتھ ہوں گے۔
مزید پڑھیں: آزاد کشمیر حکومتی تبدیلی: ن لیگ کا تحریک عدم اعتماد میں پیپلز پارٹی کا ساتھ دینے کا اعلان
’چاہے وہ پیپلز پارٹی سے اتحاد کریں یا ن لیگ سے، ہمیں اس میں کوئی دلچسپی نہیں۔‘
انہوں نے مزید کہا کہ ان کی رائے میں یہ اسمبلیاں محض ایک دکھاوا بن چکی ہیں۔ عوام کا ان پر اعتماد ختم ہو چکا ہے، اس لیے اب ان میں جو بھی اپوزیشن بنے، اس سے کوئی فرق نہیں پڑتا۔
دوسری جانب، پیپلز پارٹی کے چیئرمین بلاول بھٹو زرداری نے آج جے یو آئی (ف) کے سربراہ مولانا فضل الرحمان سے ملاقات کی، جس میں ملک کی مجموعی سیاسی صورتِ حال پر تبادلۂ خیال کیا گیا۔
بلاول بھٹو کے ہمراہ نیئر بخاری، ہمایوں خان اور جمیل سومرو جبکہ جے یو آئی (ف) کی جانب سے مولانا اسعد محمود شریک ہوئے۔
مزید پڑھیں: نمبر گیم پوری ہے تو عدم اعتماد کیوں نہیں لاتے؟ وزیراعظم آزاد کشمیر انوارالحق کا مخالفین کو پیغام
تازہ سیاسی تبدیلیوں کے بعد پیپلز پارٹی کو اب 27 ارکان کی حمایت حاصل ہے، ن لیگ کے پاس 9، پی ٹی آئی کے 5 اور 2 علاقائی جماعتوں کے پاس ایک ایک نشست ہے۔
اس طرح آزاد جموں و کشمیراسمبلی میں وزیراعظم چوہدری انوارالحق کی سربراہی میں پی ٹی آئی کے منحرف گروپ کی تعداد کم ہو کر 10 ارکان رہ گئی ہے۔
مزید پڑھیں: پیپلز پارٹی کا آزاد کشمیر میں حکومت بنانے کا اعلان، نیا وزیراعظم کون ہوگا؟
پیپلز پارٹی کے رہنما قمر زمان کائرہ نے وفاقی وزرا احسن اقبال اور رانا ثنااللہ کے ہمراہ پریس کانفرنس میں کہا تھا کہ فیصلہ کیا گیا ہے کہ آزاد کشمیر کی موجودہ حکومت مسائل حل کرنے کے بجائے بحران پیدا کرنے کا باعث بن چکی ہے۔
’اب اس بات پر اتفاق رائے ہو گیا ہے کہ اس کے خلاف عدم اعتماد کی تحریک لائی جائے گی جس میں پیپلز پارٹی اور ن لیگ مل کر آگے بڑھیں گی۔‘
