9 مئی کے پُر تشدد واقعات کے بعد جہاں سیاسی جماعت کی مذمت کی جا رہی ہے وہیں پاک فوج سے اظہار یکجہتی کا سلسلہ بھی جاری ہے۔ پاکستان کی اہم شخصیات بھی پاک فوج کی حمایت میں بول پڑیں کہا ’عوام ہمیشہ سے پاک فوج کے ساتھ کھڑے ہیں اور ان کی قربانیوں اور شہادتوں کی وجہ سے آزادی کے ساتھ جی رہے ہیں‘۔
9 مئی کو ہونیوالے جلاؤ گھیراؤ اور پر تشدد واقعات کی مذمت کرتے ہوئے سماجی کارکن رمضان چھیپا کا کہنا تھا کہ مہذب معاشروں میں پُر امن احتجاج ہوتا ہے، اپنے ہاتھوں خود کو نقصان پہنچانا کہاں کی عقلمندی ہے۔
میزبان رضوان جعفر نے کہا کہ 9 مئی کو ایک سیاہ دن کے طور پر یاد رکھا جائے گا، چند شر پسند عناصر نے پاکستان کو ناقبل تلافی نقصان پہنچایا ہے۔ عوام ہمیشہ سے پاک فوج کے ساتھ کھڑے ہیں اور ان کی قربانیوں اور شہادتوں کی وجہ سے آزادی کے ساتھ جی رہے ہیں۔
میزبان ندا یاسر نے پاک فوج سے اظہار یکجہتی کرتے ہوئے کہا کہ عوام ہمیشہ سے پاک فوج کے ساتھ کھڑے ہیں، ہماری فوج ایک عظیم فوج ہے، ہمیشہ کڑے وقت میں وطن کے کام آئی ہے، ہم اپنی فوج پر اعتماد کرتے ہیں اور ان کی وجہ سے سکون کی نیند سو پاتے ہیں، اپنی رائے کا اظہار ضرور کریں لیکن پاک فوج کو بیچ میں نہ لائیں۔
بریگیڈئیر (ر) حارث نواز کا کہنا تھا کہ کبھی بھی سیاسی شر پسندوں سے ایسی امید نہیں رکھتے تھے، جہاں تک پاک فوج کی بات ہے تو فوج کسی بھی سیاسی پارٹی کے ساتھ جانبداری نہیں رکھتی۔
تاجر حامد پونا والا کا کہنا تھا کہ پوری قوم شر پسندوں کی وجہ سے شرمندہ ہے، بین الاقوامی سطح پہ پاکستان کی ساکھ کو شدید نقصان پہنچایا گیا ہے، جو کام دشمن نہ کر سکا وہ ہمارے لوگوں نے کر دیا، ہم پاکستان سے شرمندہ ہیں۔
