فیلڈ مارشل سید عاصم منیر نے کہا ہے کہ پاکستان امن پسند ملک ہے، جنگ مسلط کرنے والوں کو اسی طرح جواب دیں گے جیسا مئی میں دیا تھا۔
ایوان صدر میں اردن کے بادشاہ شاہ عبداللہ دوم کے اعزاز میں ظہرانے کی تقریب میں گفتگو کرتے ہوئے انہوں نے کہاکہ اللہ کے حکم اور اس کے فرمان کے مطابق اپنے فرائض کی انجام دہی کرتا ہوں۔
مزید پڑھیں: جنگ مسلط کرنے والوں کو اسی طرح جواب دیں گے جیسا مئی میں دیا تھا، فیلڈ مارشل سید عاصم منیر
فیلڈ مارشل نے کہاکہ جب مسلمان اللہ پر بھروسہ کرتا ہے تو اللہ دشمن پر اس کی پھینکی مٹی کو بھی میزائل بنا دیتا ہے، بھارت کے خلاف جنگ میں اللہ نے پاکستان کو سربلند کیا ہے۔
انہوں نے کہاکہ یہ کامیابی اللہ کی طرف سے ہیں، بھارت کے خلاف جنگ میں جذبہ ایمانی سے فتح ملی، اللہ کے شکر گزار ہیں کہ جس نے ہمیں فتح دلائی۔
فیلڈ مارشل کو جب مہمانوں کی طرف سے پاکستان کی بڑی کامیابی پر مبارکباد دی گئی تو انہوں نے کہا کہ یہ سب اللہ کا کرم ہے۔ انہوں نے قرآنی آیات پڑھ کر واضح کیاکہ مسلمانوں کی اصل کامیابی اللہ کی مدد سے ہوتی ہے اور اس تناظر میں غزوہ اُحد کی مثال پیش کی کہ اس موقع پر پرندوں نے مسلمانوں کی مدد کی تھی۔
ملاقات کے بعد فیلڈ مارشل نے شاہ عبداللہ کو رخصت کیا اور اسی موقع پر برطانوی ہائی کمشنر اور برطانوی سفیر سے بھی مختصر گفتگو کی۔ صدر ممملکت آصف علی زرداری نے اس موقع پر گفتگو میں کہاکہ پاکستان کے برطانیہ اور امریکا کے ساتھ ایسے تعلقات ہیں جیسے خاندان کے افراد کے ساتھ ہوتے ہیں۔
اس دوران چیئرمین پی پی پی بلاول بھٹو اور خاتون اول بختاور بھٹو بھی موجود تھے جبکہ صدر پاکستان بھی ملاقات میں شریک رہے۔
گزشتہ روز کی ملاقات میں شاہ عبداللہ نے پاکستان کی جوہری صلاحیتوں اور دہشتگردی کے خلاف طویل جنگ میں پاکستانی قوم اور فوج کی قربانیوں کا اعتراف کیا۔
شاہ عبداللہ نے پاکستان کی فوجی صلاحیتوں کو سراہتے ہوئے کہا کہ پاکستان نے عالمی امن کے لیے نمایاں کردار ادا کیا ہے اور دہشتگردی کے خلاف سب سے زیادہ قربانیاں اسی ملک نے دی ہیں۔
واضح رہے کہ اردن کے بادشاہ شاہ عبداللہ دوم پاکستان کا دو روزہ دورہ مکمل کر کے واپس روانہ ہو گئے ہیں، دورہ پاکستان کے موقع پر انہوں نے اعلیٰ قیادت سے ملاقاتیں کیں۔
بادشاہ اردن کے دورہ کے موقع پر دونوں ممالک کے تعاون کو بڑھانے پر اتفاق کیا، جبکہ کئی مفاہمتی یادداشتوں پر بھی دستخط کیے گئے۔
گزشتہ روز جب اردن کے بادشاہ شاہ عبداللہ دوم پاکستان پہنچے تو صدر مملکت آصف زرداری، وزیراعظم شہباز شریف نے خود ایئرپورٹ پر ان کا فقید المثال استقبال کیا۔ جبکہ وزیراعظم ہاؤس میں انہیں گارڈ آف آنر بھی دیا گیا۔
