بھارتی ٹینس اسٹار ثانیہ مرزا نے پہلی بار اس بات کا کھل کر اعتراف کیا ہے کہ سابق شوہر شعیب ملک سے علیحدگی کے بعد بطور سنگل پیرنٹ زندگی گزارنا ان کے لیے کتنا مشکل ہے۔ انہوں نے بتایا کہ سرحد پار بچے کی پرورش نہایت چیلنجنگ ذمہ داری ہے۔
ثانیہ مرزا، جو پاکستانی کرکٹر شعیب ملک سے شادی کے بعد دبئی منتقل ہوئیں، علیحدگی کے بعد اپنے بیٹے اذہان کی بنیادی ذمہ داری نبھا رہی ہیں۔ ایک حالیہ گفتگو میں، جو انہوں نے فلم ساز اور میزبان کرن جوہر کے ساتھ کی، ثانیہ مرزا نے اعتراف کیا کہ تنہا والدین بننا نہ صرف جذباتی طور پر بھاری ہے بلکہ اپنے مصروف پیشہ ورانہ معمول کے ساتھ اسے سنبھالنا بھی مشکل ہو جاتا ہے۔
یہ بھی پڑھیں شعیب ملک سے طلاق کے بعد کن مشکلات سے گزرنا پڑا؟ ثانیہ مرزا نے اپنے شو میں سب کچھ بتادیا
گفتگو کے دوران ثانیہ نے کہا ’میرے لیے سنگل پیرنٹنگ مشکل ہے، خاص طور پر اس لیے کہ ہم کام بھی کر رہے ہوتے ہیں اور متعدد ذمہ داریاں ساتھ ساتھ نبھانا پڑتی ہیں۔‘
کرن جوہر، جو خود بھی اپنے جڑواں بچوں یش اور روحی کے سنگل پیرنٹ ہیں، نے ثانیہ کو اس صورتحال کا مثبت پہلو دکھانے کی کوشش کرتے ہوئے کہا ’کیا آپ نے اس کا دوسرا رخ دیکھا ہے؟ یہ ایک طرح سے آزاد کر دینے والا تجربہ بھی ہے کیونکہ آپ کو کسی دوسرے شخص کے ساتھ فیصلہ سازی کے تنازعے کا سامنا نہیں کرنا پڑتا۔‘
ثانیہ مرزا نے اس بات کا بھی ذکر کیا کہ کئی بار وہ کام کے سلسلے میں گھر سے نکلتے وقت اپنے بیٹے کو پیچھے چھوڑتے ہوئے اپنے آپ کو جذباتی طور پر بہت کمزور محسوس کرتی ہیں، اور بعض اوقات تنہائی سے بچنے کے لیے کھانا تک چھوڑ دیتی ہیں تاکہ اکیلے میز پر بیٹھنے کا احساس نہ ہو۔
یہ بھی پڑھیے ثانیہ مرزا کے شب و روز آج کل کیسے گزر رہے ہیں؟ نئی تصاویر جاری
انہوں نے اعتراف کیا کہ والدین کی ذمہ داری اور پیشہ ورانہ زندگی کے تقاضوں کے درمیان توازن رکھنا سب سے بڑا چیلنج ہے، خاص طور پر جب بچہ سرحد کے دونوں جانب والدین کے ساتھ وقت گزارتا ہو۔
ثانیہ مرزا کی یہ گفتگو بہت سے سنگل والدین کے لیے قابلِ فہم جذبات کی عکاسی کرتی ہے، جو اپنی پیشہ ورانہ مصروفیات کے ساتھ بچوں کی ذمہ داریاں بھی نبھاتے ہیں۔
