بالی وڈ اداکار منوج باجپائی نے کہا ہے کہ شاہ رخ خان نے بہت چھوٹی عمر میں اپنا خاندان کھو دینے کے بعد اپنی زندگی کو دوبارہ بنایا اسی لیے وہ شاہ رخ خان کی عزت کرتے ہیں۔
بالی وڈ کے کنگ خان کی جدو جہد اور ان کا عالمی اسٹار بننے کا سفر بے شمار اداکاروں کو متاثر کرتا ہے۔
حال ہی میں اداکار منوج باجپائی نے ایک انٹر ویو میں کہا کہ پٹھان اداکار نے نہ صرف انڈسٹری میں اپنے لیے جگہ بنائی بلکہ اپنی ذاتی زندگی کو بھی ازسر نو تعمیر کیا۔
منوج باجپائی کا کہنا تھا کہ جس طرح کی دنیا شاہ رخ خان نے اپنے لیے کھڑی کی اس مقام پر شاہ رخ خان کو دیکھ کر انہیں بہت خوشی ہوتی ہے۔
انہوں نے مزید کہا کہ ایک ایسا انسان جس نے 26سال کی عمر میں اپنا پورا خاندان کھو دیا تھا اس نے خود اپنی دنیا بنائی،اپنا خاندان تخلیق کیا،اپنا بہت بڑا نام اور عزت بنائی۔
نیشنل ایوارڈ یافتہ ہندوستانی اداکار نے کہا کہ وہ ان کی اس لیے عزت کرتے ہیں کیونکہ وہ شاہ رخ خان کے ان دوستوں میں سے تھے جنہوں نے شاہ رخ خان کو مشکلوں سے نکلتے ہوئے دیکھا تھا۔
منوج باجپائی کا کہنا تھا کہ جب وہ اور شاہ رخ 19،20سال کے تھےتو دونوں نے تقریباً ڈیڑھ سال تک ایک ساتھ کام کیا۔
وہ اور شاہ رخ خان زیادہ نہیں ملتے دونوں اداکاروں کی دنیا الگ ہے۔اداکار نے کہا کہ انہوں نے اپنی دنیا بنائی اور شاہ رخ خان نے اپنی۔
