وفاقی وزیراطلاعات عطاتارڑ نے کہا ہے کہ پی ٹی آئی فاشسٹ اور شرپسند جماعت ہے، اس پر پابندی حوالے سے کوئی فیصلہ قانون کے مطابق ہوگا۔
نجی ٹی وی پروگرام میں گفتگو کے دوران وفاقی وزیر اطلاعات عطاتارڑ سے سوال کیا گیا کہ واقعتاً سیاسی طور پر یہ فیصلہ ہو چکا ہے کہ پی ٹی آئی پاکستان میں سیاسی طور پر کام نہیں کر سکتی؟ جواب میں عطاتارڑ نے کہا کہ یہ ایک حقیقت ہے کہ پی ٹی آئی فاشسٹ اور شرپسند جماعت ہے۔
یہ بھی پڑھیں: سیاسی معاملات پر پی ٹی آئی سے بات کے لیے تیار ہیں لیکن کیسز میں ریلیف صرف عدالتوں سے ہی مل سکتا ہے، عطاتارڑ
عطاتارڑ نے کہا کہ جن کا لیڈر طالبان کا حامی ہو اور ان کو اپنا دوست قرار دیتا ہو، ان کو ملک میں واپس لانے اور ملک میں دہشت گرد حملوں کو فروغ دینے میں اس کا کردار ہو، تحریک انصاف پر پابندی کی جو باتیں ہو رہی ہیں تو وہ اس لیے ہو رہی ہیں کہ پرو دہشتگرد جماعت ہے، پرو ٹی ٹی پی جماعت ہے۔
انہوں نے کہا کہ 9 مئی کو فوجی تنصیبات، قومی املاک پر حملے، شہدا کی یادگاروں پر حملے، ایسا دشمن نے بھی آج تک نہیں کیا، پی ٹی آئی نے لبادہ سیاسی جماعت کا اوڑھا ہوا ہے اور کام دہشتگردوں والے ہیں، پی ٹی آئی کی پوری تاریخ اس طرح کے واقعات کے ساتھ بھری پڑی ہے۔
انہوں نے کہا کہ حکومت نے پی ٹی آئی کو بہت موقع دیا بات چیت کے لیے مگر پی ٹی آئی والے بات کو سمجھ نہیں پاتے، جب بھی پی ٹی آئی پر پابندی حوالے سے کوئی فیصلہ ہو گا تو اس کا قانونی جواز ہو گا، یہ فیصلہ جب بھی ہو سیاسی نہیں ہو سکتا، اس کا قانونی جواز ہو گا۔
’پی ٹی آئی نے اس حوالے سے بہت سی وجوہات مہیا کی ہیں، دیکھتے ہیں یہ کب ہوتا ہے، پنجاب اسمبلی میں قرارداد پاس ہوئی ہے جو بالکل ٹھیک پاس ہوئی ہے۔‘
یہ بھی پڑھیں: اوورسیز کنونشن سے بیرون ملک بھگوڑوں کے پیٹ میں مروڑ اٹھ رہے ہیں، عطاتارڑ
ان کا کہنا تھا کہ ملکی تاریخ میں کبھی کسی نے آئی ایم ایف کو خط لکھا کہ وہ پاکستان کی امداد نہ کرے، کوئی سیاسی لیڈر یا جماعت ملک سے بڑی نہیں ہے، کبھی اتنے برے طریقے سے فوج کے ادارے کو ٹارگٹ نہیں کیا گیا جیسے پی ٹی آئی کر رہی ہے، اس کو مسلم لیگ ن کی قیادت بڑی سنجیدگی سے دیکھ رہی ہے۔
’آج وزیراعظم نے بھی علما کرام سے خطاب میں کہا کہ یہ پاکستانیت نہیں ہے، پاکستان ایسے چل ہی نہیں سکتا کہ دفاعی ادارے کو آپ برا بھلا کہیں، اس کے خلاف ہرزہ سرائی کریں۔‘
عطاتارڑ نے کہا کہ فوج کے خلاف باتیں کرنے والے ان کو باتیں سناتے ہیں جو سیاچن میں شدید سردی میں کھڑے ہیں، جو دہشتگردوں کے سامنے گولیاں کھانے کے لیے اپنا سینہ پیش کرتے ہیں، جو اپنے بچوں کو یتیم کر کے چلے جاتے ہیں کہ آپ کے بچے اور میرے بچے محفوظ رہیں، یہ خود واٹر کینن کے آگے سے بھاگ جاتے ہیں اور باتیں ان کو کر رہے ہیں جو خودکش بمباروں کے آگے کھڑے ہیں۔
یہ بھی پڑھیں: عمران خان 190 ملین پاؤنڈ کی چوری چھپانے کے لیے مذہب کارڈ استعمال کر رہے ہیں،عطاتارڑ
انہوں نے کہا کہ تحریک انصاف جواز پیدا کر رہی ہے کہ اس پر پابندی لگائی جائے، اس حوالے سے جب تک قانونی طور پر تمام لوازمات پورے نہیں ہوتے تو پھر معاملہ عدالتوں میں جاتا ہے، آج اگر فوری طور پر فیصلہ کر دیا جائے اور کل عدالت اس فیصلے کو اسٹرائیک ڈاؤن کر دے تو یہ مناسب بات نہیں ہو گی۔
ان کا کہنا تھا کہ اس حوالے سے جب بھی فیصلہ ہو گا قانونی طریقہ کار کو فالو کرتے ہوئے فیصلہ ہو گا، فیصلہ اتنا مضبوط ہو گا کہ عدالتوں میں قانونی پروسیس کو پاس کا سکے گا۔
