ڈی ایچ کیو اسپتال ایبٹ آباد میں تعینات ڈاکٹر وردہ کے اغوا اور قتل کیس میں تحقیقات کے دوران اہم پیش رفت سامنے آئی ہے۔ پولیس نے ملزمان کی نشاندہی پر قتل میں استعمال ہونے والا آلہ قتل برآمد کر لیا ہے۔
ایبٹ آباد پولیس کے مطابق کیس کے ماسٹر مائنڈ ردا کے شوہر وحید بلا کے قبضے سے سونا بھی برآمد ہوا ہے۔
مزید پڑھیں: ڈاکٹر وردہ قتل کیس، مرکزی ملزم پولیس مقابلے میں ہلاک
پولیس نے بتایا کہ ملزمان کے قبضے سے سونے کی 10 رسیدیں اور ایک کروڑ 23 لاکھ روپے کے چیک بھی حاصل کیے گئے ہیں۔
مزید تحقیقات کے دوران ملزمان کی نشاندہی پر قتل میں استعمال ہونے والی رسی بھی برآمد کی گئی، جس سے ڈاکٹر وردہ کو گلہ دبا کر موت کے گھاٹ اتارا گیا تھا۔
واضح رہے کہ ایبٹ آباد سے تعلق رکھنے والی ڈاکٹر وردہ کو اپنی ہی دوست نے پلاننگ کرکے قتل کرا دیا تھا۔
گزشتہ روز خیبرپختونخوا پولیس نے بتایا تھا کہ ڈاکٹر وردہ قتل کیس کا مرکزی ملزم پولیس مقابلے میں ہلاک ہو گیا ہے۔
آئی جی خیبرپختونخوا کے مطابق ڈاکٹر وردہ قتل کیس کا مرکزی ملزم شمریز، پولیس مقابلے کے دوران مارا گیا۔ انہوں نے بتایا کہ ملزم واقعے کے بعد سے فرار تھا، تاہم پولیس ٹیم نے دن رات محنت کرکے اس کیس پر کام کیا۔ کیس میں نامزد دیگر ملزمان کو پہلے ہی گرفتار کیا جاچکا ہے۔
مزید پڑھیں: لین دین کا تنازع: 4 روز قبل اغوا ہونے والی لیڈی ڈاکٹر کی تشدد زدہ لاش برآمد، سہیلی ملوث نکلی
یاد رہے کہ ڈی ایچ کیو اسپتال ایبٹ آباد میں تعینات ڈاکٹر وردہ مشتاق کو گزشتہ ہفتے اغوا کے بعد قتل کیا گیا تھا۔
