ممتاز سینیئر صحافی نسیم زہرہ نے بھارتی ریاست بہار کے وزیراعلیٰ نتیش کمار کی جانب سے گریجویشن تقریب کے دوران خاتون ڈاکٹر کا حجاب کھینچنے کے واقعے کی مذمت کی ہے۔
ایک ویڈیو پیغام میں انہوں نے کہا کہ یہ حیران کن بات ہے کہ انڈیا کے اتنے اعلیٰ سطح کے سیاستدان نے عجیب حرکت کی ہے، خاتون ایک پیشہ ور ڈاکٹر ہے، اس کا حجاب کھینچنا سمجھ سے باہر ہے۔
یہ بھی پڑھیے: مسلم خاتون ڈاکٹر کا نقاب کھینچ کر اتارنے کا افسوسناک واقعہ، بھارت میں وزیراعلیٰ نتیش کمار کی نااہلی کی تحریک چل پڑی
نسیم زہرہ نے کہا کہ اس موقع پر بی جے پی کا ردعمل دلچسپ اور اس کی روایتی سیاست کے مطابق ہے اور انہوں نے اسے غلط قرار دینے کے بجائے کانگریس کے ایک لیڈر کی پرانی ویڈیو وائرل کی ہے جس میں وہ کسی خاتون کا گھونگھٹ کھینچ رہا ہے۔
سینیئر صحافی نے اسے فرعونیت اور قابل مذمت قرار دیتے ہوئے کہا کہ اس حرکت کا تہذیب اور عقل سے کوئی تعلق نہیں۔
واضح رہے کہ بھارتی ریاست بہار کے دارالحکومت پٹنہ میں ایک سرکاری تقریب کے دوران وزیر اعلیٰ نتیش کمار کی جانب سے ایک مسلمان خاتون ڈاکٹر کا نقاب زبردستی اتارنے کی کوشش کی گئی۔
یہ بھی پڑھیے: مسلم خاتون کا حجاب کھینچنے پر بھارتی دیوبندی علما کی سخت تنقید، مودی سے فوری ایکشن کا مطالبہ
کانگریس نے اس واقعے پر سخت ردعمل دیتے ہوئے نتیش کمار کی سرزنش کی اور کہا کہ بہار کے وزیر اعلیٰ کا یہ رویہ ناقابلِ قبول ہے۔ ایک خاتون ڈاکٹر اپنا اپائنٹمنٹ لیٹر لینے آئی تھیں اور اس موقع پر نتیش کمار نے ان کا حجاب اتارنے کی کوشش کی جو نہ صرف بدتمیزی بلکہ ناقابلِ معافی عمل ہے۔ کانگریس نے مطالبہ کیا ہے کہ اس واقعے کے ذمہ دار وزیر اعلیٰ فوری طور پر استعفیٰ دیں۔
