وزیراعلیٰ خیبرپختونخوا سہیل آفریدی کے اچانک دورے کے بعد لیڈی ریڈنگ اسپتال پشاور کے ڈائریکٹر کو ناقص کارکردگی پر فوری طور پر عہدے سے ہٹا دیا گیا ہے۔
یہ بھی پڑھیں: پشاور: لیڈی ریڈنگ اسپتال کے زنانہ انتظار گاہ سے معذور بچی کی لاش برآمد
خیبرپختونخوا حکومت کی جانب سے جاری مراسلے کے مطابق وزیراعلیٰ سہیل آفریدی کے معائنے کے دوران لیڈی ریڈنگ اسپتال میں مریضوں کی دیکھ بھال اور انتظامی امور تشویشناک حد تک کمزور پائے گئے، جس پر سخت نوٹس لیتے ہوئے ڈائریکٹر کو عہدے سے فارغ کرنے کا فیصلہ کیا گیا۔
مراسلے میں بتایا گیا ہے کہ وزیراعلیٰ کی ہدایت پر پیڈز ایمرجنسی کے سربراہ کو بھی معطل کر دیا گیا ہے جبکہ معاملے کی چھان بین کے لیے فیکٹ فائنڈنگ انکوائری شروع کرنے کی ہدایت جاری کی گئی ہے۔
صوبائی حکومت کی جانب سے واضح کیا گیا ہے کہ نوزائیدہ بچوں اور ایمرجنسی مریضوں کی نگہداشت میں کسی بھی قسم کی غفلت ناقابلِ قبول ہے اور اس حوالے سے کسی کو رعایت نہیں دی جائے گی۔
یہ بھی پڑھیں: سرکاری اسپتال لیڈی ریڈنگ کے روم چارجز 10 ہزار روپے مقرر، اصل ماجرا کیا ہے؟
مراسلے کے مطابق صوبائی حکومت نے صحت کے شعبے میں ناقص کارکردگی کے خلاف زیرو ٹالرنس پالیسی پر سختی سے عملدرآمد کا اعادہ کیا ہے اور ذمہ داروں کے خلاف بلا امتیاز کارروائی جاری رکھی جائے گی۔
