وسطی بولیویا کے توروتورو نیشنل پارک میں واقع کاریراس پامپا کے مقام پر سائنسدانوں نے دنیا میں ڈائنوسار کے قدموں کے نشانات کا سب سے بڑا مقام دریافت کرلیا ہے۔
ماہرین کے مطابق یہاں گوشت خور ڈائنوساروں کے 16 ہزار 600 سے زائد قدموں کے نشانات ملے ہیں، جو قریباً 6 کروڑ 60 لاکھ سال پرانے ہیں۔ یہ نشانات 2 ٹانگوں پر چلنے والے ڈائنوساروں (تھیروپوڈز) کے ہیں، جن میں چلنے، دوڑنے اور حتیٰ کہ پانی میں تیرنے کے شواہد بھی شامل ہیں۔
یہ تحقیق بین الاقوامی ماہرین کی ٹیم نے 6 سالہ محنت کے بعد مکمل کی اور اسے معروف سائنسی جریدے (PLOS One) میں شائع کیا گیا۔
مزید پڑھیں: راجستھان میں ڈائنوسار سے متعلق پانچویں بڑی دریافت، سائنسی تصدیق کیسے ہوگی؟
محققین نے بتایا کہ اس مقام پر 1,321 مکمل راستے، سینکڑوں الگ الگ قدموں کے نشان، دُم گھسیٹنے کے آثار اور 1,378 تیراکی کے نشانات دریافت ہوئے ہیں۔ یہ تمام آثار ایک ہی فوسل سطح پر نو منسلک حصوں میں پھیلے ہوئے ہیں، جو قریباً ایک فٹبال میدان کے برابر رقبے پر محیط ہیں۔
The “world’s largest” dinosaur footprint site has been discovered in Bolivia’s Toro Toro National Park.
🎧 How are we still finding new dinosaurs? https://t.co/0kBkUEorix pic.twitter.com/c868Ompuei
— BBC World Service (@bbcworldservice) December 17, 2025
نشانات کے سائز میں نمایاں فرق اس بات کی نشاندہی کرتا ہے کہ یہاں مختلف اقسام کے ڈائنوسار آئے، جن میں کچھ 33 فٹ لمبے تھے جبکہ بعض جدید مرغی جتنے چھوٹے بھی تھے۔
ماہرین کے مطابق یہ علاقہ مستقل رہائش نہیں بلکہ ایک قدیم جھیل کے کنارے واقع قدرتی گزرگاہ تھا، جو ممکنہ طور پر آج کے جنوبی پیرو اور شمال مغربی ارجنٹینا کو آپس میں ملاتا تھا۔
سائنسدانوں کا کہنا ہے کہ ہڈیوں کے فوسلز کے برعکس، قدموں کے نشانات ڈائنوساروں کے روزمرہ رویّے، رفتار، رُکنے، مڑنے اور پانی میں حرکت جیسے پہلوؤں کو سمجھنے میں مدد دیتے ہیں۔
مزید پڑھیں: ڈائنوسار کے رشتے دار دیوہیکل پرندوں سے متعلق دلچسپ حقائق دریافت
اس مقام پر ابتدائی پرندوں کے قدموں کے نشان بھی ملے ہیں، جو اس بات کی تصدیق کرتے ہیں کہ یہ علاقہ کسی زمانے میں ایک متحرک اور متنوع ماحولیاتی نظام کا حصہ تھا۔
بولیویا پہلے ہی ’کال اورکو‘ کے مقام پر قریباً 12 ہزار ڈائنوسار نشانات کی وجہ سے مشہور ہے، اور اب ’کاریراس پامپا‘ کی دریافت نے ملک کو ڈائنوسار تحقیق کے عالمی نقشے پر مزید نمایاں کر دیا ہے۔
